Трамп Флорида штатында журналистерге берген мәлімдемесінде жартылай автономды аумақты басқарып отырған Данияның жеткілікті әскери қорғаныс қамтамасыз етпей отырғанын алға тартып, «Ұлттық қауіпсіздік үшін бізге Гренландия керек», - деді.

Президент бұл мәлімдемені Луизиана штатының губернаторы Джефф Лэндриді Вашингтонның Гренландия жөніндегі арнайы өкілі етіп тағайындағаннан кейін жасады.

Трамп: «Бізге Гренландия пайдалы қазбалар үшін емес, ұлттық қауіпсіздік үшін қажет. Егер Гренландияға жоғарыдан жағалау бойымен көз салсаңыз, барлық жерде Ресей мен Қытай кемелерін көресіз. Ұлттық қауіпсіздік үшін бұл аумақ бізге керек. Біз оны алуға тиіспіз. Гренландия — өте маңызды мәселе», — деді.

Данияның жауабы

Бұл мәлімдемелерге Копенгаген мен Нууктан жедел жауап келді. Дания премьер-министрі Метте Фредериксен мен Гренландия премьер-министрі Йенс-Фредерик Нильсен бірлескен мәлімдемеде Гренландияның өз халқына тиесілі екенін атап өтіп, «Басқа бір мемлекетті аннексиялай алмайсыз. Тіпті халықаралық қауіпсіздік сылтауымен де болмайды. Гренландия — гренландиялықтарға тиесілі, АҚШ Гренландияны өз бақылауына ала алмайды», - деді.

Дания Сыртқы істер министрі Ларс Лёкке Расмуссен Лэндридің тағайындалуынан кейін АҚШ-тың Даниядағы елшісі Кеннет А. Хауриді түсініктеме беру үшін шақыратынын айтты.