Украина делегациясы 17-18 ақпан күндері АҚШ-тың арағайындығымен өтуі мүмкін бейбіт келіссөздерге қатысу үшін Женеваға аттанды. Бұл туралы Украина президенті кеңсесінің басшысы Кирило Буданов мәлімдеді.
Буданов дүйсенбі күні «Telegram» желісінде өзі мен делегацияның екі мүшесінің пойыз вагонының алдында түскен фотосуретін жариялап, «Женеваға бара жатырмыз. Келіссөздердің келесі кезеңі бізді күтуде. Жол үстінде әріптестерімізбен тарихымыздан алған тәжірибелерді талқылап, дұрыс қорытындыға келуге тырысамыз. Украинаның мүдделері қорғалуы тиіс», - деп жазды.
Биыл Ресей, Украина және АҚШ қатысқан алғашқы үшжақты қауіпсіздік кездесуінің бірінші кезеңі 23-24 қаңтар күндері Біріккен Араб Әмірліктерінің астанасы Абу-Дабиде өткен еді. Бұл кездесуде Мәскеу делегациясын Ресей Федерациясының Бас барлау басқармасының бастығы Игорь Костюков басқарды.
Екінші кезең де 4-5 ақпан күндері Абу-Дабиде өтті.
Кремльдің баспасөз хатшысы Дмитрий Песков өткен апта Украинадағы реттеу үдерісіне қатысты келесі келіссөздер кезеңі Ресей-АҚШ-Украина үшжақты форматында өтетінін және кездесулер 17-18 ақпан күндері Швейцарияның Женева қаласында ұйымдастырылатынын мәлімдеген болатын.
