Иран Сыртқы істер министірлігінің ресми өкілі Исмаил Бекаи әлеуметтік желідегі парақшасында соңғы күндері әлеуметтік желілерде Иранның Ормуз бұғазы маңындағы Кешм аралы жағалауындағы мұнаймен ластануды көрсететін кадрлар таралғанын білдірді.
Бекаи ластанудың Парсы шығанағынан жағалауға қарай жылжып келгенін және алдын ала тексеру нәтижелері бойынша ластануға шетелдік жүк кемесі себеп болуы мүмкін екенін хабарлады.
Бекаи ластану Кешм аралы жағалауының үш нүктесінде және теңіз бетінің кейбір бөліктерінде анықталғанын жеткізді. Оның айтуынша, бұл оқиға Парсы шығанағы мен Оман теңізінде соңғы жылдары байқалған ауқымды экологиялық проблемалардың тек көзге көрінетін бөлігі ғана.
Аймақтағы сулар мен теңіз экожүйесінің ашық әрі жасырын ластану көздерінің салдарынан елеулі зардап шеккеніне назар аударған Бекаи мұның Иранның жағалау аймақтарына «триллиондаған доллар» көлемінде шығын келтіргенін мәлімдеді.
Иранның Парсы шығанағы мен Оман теңізі бойындағы ең ұзын жағалау сызығына ие ел екенін еске салған Бекаи Тегеранның аймақтағы экологиялық залалға бейжай қарай алмайтынын айтып, былай деді:
«Бұл шығындарды өтеуге кім жауапты? Біздің аймақтан экспортталатын арзан энергияны тұтынатын елдер ме, жүк тасымалын сақтандырушылар ма, әлде Парсы шығанағы мен Оман теңізін әскери операциялар мен аса жойқын қаруларды сынайтын алаңға айналдырған басқыншылар мен олардың серіктестері ме? Ормуз бұғазы арқылы жүзеге асырылатын коммерциялық тасымалдан пайда көретін әрбір тарап Парсы шығанағы мен Оман теңізіне келтірілген экологиялық залалды өтеуге заңдық та, моральдық та тұрғыдан міндетті».
