Испанияның премьер-министрі Педро Санчес сәрсенбі күні Таяу Шығыста әскери шиеленіс күшейіп жатқан тұста бір тарапты қолдауды үзілді-кесілді қабылдамайтынын айтып, Израиль, АҚШ және Иранды дереу атысты тоқтатуға шақырды.
«X» әлеуметтік желісінде жарияланған видеоүндеуінде Санчес Испанияның соғысқа қарсы екенін мәлімдеді.
2003 жылғы Иракқа басып кіруді мысалға алған Педро Санчес «Азор аралдарының саяси ұстанымы» туралы ескерту жасады. Ол 2003 жылғы Азор саммитін еске салып, сол кезде АҚШ президенті Джордж Буш, Ұлыбритания премьер-министрі Тони Блэр және Испания премьер-министрі Хосе Мария Аснар дипломатиялық жолды шетке ысырып, Иракқа шабуыл алдында Саддам Хусейнге соңғы ескерту жасағанын айтты. Санчестің айтуынша, мұндай шешімдер Еуропа үшін қауіпті әлем мен нашар өмір жағдайына алып келген.
Ол Испания кек алу қорқынышымен әлемге зиян келтіретін әрекеттердің серіктесі болмайтынын атап өтті. Санчес сондай-ақ Испания армиясы аймақта жүрген азаматтарды эвакуациялау үшін тәулік бойы жұмыс істеп жатқанын растады.
Ол: «Еліміздің экономикалық, институционалдық күшіне толық сенеміз. Осындай сәттерде испан болғанымызды мақтан тұтамыз», - деді.
Испания мен АҚШ арасындағы шиеленіс жоғары деңгейде. Мадрид Иранға жасалған шабуылдарды айыптап, Вашингтонның Испаниядағы әскери базаларды Иранға қарсы шабуыл үшін пайдалануына рұқсат беруден бас тартты.
Бұған дейін Испания Сыртқы істер министрі Хосе Мануэль Альбарес Буэно Испанияның АҚШ-пен әскери ынтымақтастыққа келіскені туралы мәлімдемелерді жоққа шығарды.
«Cadena SER» радиосына берген сұхбатында Альбарес Ақ Үйдің мәлімдемелерін жоққа шығарып, «Таяу Шығыстағы соғыс пен Иранға жасалған шабуыл Испания үкіметінің базаларын пайдалану мәселесіндегі ұстанымын еш өзгерткен жоқ», - деді.
Бұл мәлімдеме Ақ Үйдің баспасөз хатшысы Каролин Ливитт Испания АҚШ-пен ынтымақтастыққа келгенін жеткізгеннен кейін жасалды. Ливитт бұл келісім АҚШ президенті Дональд Трамп Еуропадағы одақтасына сауданы тоқтатамыз деп ескерткеннен кейін жасалғанын мәлімдеді.
Дональд Трамптың ультиматумы Мадрид АҚШ-тың Испаниядағы әскери базаларын Иранға қарсы шабуыл үшін пайдалануға рұқсат бермейтінін мәлімдегеннен кейін жасалды.
Ливитт журналистерге: «Президенттің Испанияға қатысты кеше айтқан сөзін олар анық әрі нақты естіді деп ойлаймын. Менің түсінуімше, олар АҚШ әскерімен ынтымақтастыққа келісім берді. Сондықтан АҚШ әскері Испаниядағы әріптестерімен үйлестіру жұмыстарын жүргізіп жатыр», - деді.
