Түркия Оңтүстік-Шығыс Азия мемлекеттері қауымдастығының (ASEAN) Манилада өткен Сыртқы істер министрлері кеңесінің шешімімен ASEAN-ның Диалог серіктесі мәртебесіне ие болды.
Сыртқы істер министрі Хакан Фидан сейсенбі күні “X” әлеуметтік желісінде жариялаған жазбасында бұл нәтиже президент Режеп Тайып Ердоғанның жетекшілігімен жүргізіліп отырған Түркияның көпвекторлы сыртқы саясатының көрінісі екенін және мұндай саясат халықаралық күн тәртібі мен жаһандық жүйені қалыптастыруға ықпал ете алатынын айтты.
Фиданның айтуынша, мұндай мәртебе тек 11 мемлекетке ғана берілген.
Министр 2024 жылы ресми түрде ұсынылған Түркияның өтінімін қолдаған әріптестеріне, ASEAN-ға қазіргі төрағалық етіп отырған Филиппин билігіне және үдерісті үйлестірген ASEAN Хатшылығына алғыс білдірді.
Жаһандық дипломатия
Фидан бұл жетістік Түркияның Азия-Тынық мұхиты аймағындағы қатысуын күшейту тұрғысынан аса маңызды екенін айтып, аталған өңірді Түркияның жаһандық дипломатиясының шығыс бағыты ретінде сипаттады.
Министрдің сөзінше, бұл мәртебе Анкараның ASEAN өңіріне қатысты ұзақ мерзімді стратегиясын ілгерілетуге және қолданыстағы жобаларды жүзеге асыруға мүмкіндік береді.
Фидан Түркия мен ASEAN арасындағы институционалдық ынтымақтастықтың негізі 2010 жылы қаланғанын еске салып, содан бері серіктестіктің көптеген саладағы ынтымақтастықты кеңейткенін және екіжақты сауда көлемі 6,5 миллиард доллардан 16 миллиард долларға дейін өскенін айтты.
Диалог серіктесі мәртебесін алғаннан кейін Анкара халқы шамамен 700 миллион адамды құрайтын әрі экономикасының көлемі 4 триллион доллардан асатын ASEAN бірлестігімен саяси және экономикалық ынтымақтастықты одан әрі тереңдетуге үміттенетінін жеткізді.
Министр жаңа кезеңнің Түркия үшін де, ASEAN-ға мүше мемлекеттер үшін де пайдалы болуына тілектестік білдіріп, мәлімдемесін қорытындылады.
680 миллионнан астам халықты біріктіретін ASEAN Оңтүстік-Шығыс Азиядағы сауда, экономикалық өсім және өңірлік дипломатияның негізгі қозғаушы күштерінің бірі саналады және әлемдегі ең ірі өңірлік бірлестіктердің қатарында.
