Жартылай ресми «Fars» ақпарат агенттігі жариялаған мәлімдемеде министрлік танкер мен байланыс нысанына қарсы жасалған АҚШ армиясының лаңкестік сипаттағы агрессиялық әрекетін қатаң айыптайтынын мәлімдеді.
Министрліктің хабарлауынша, шабуылдар сәрсенбі күні таңертең Кувейт пен Бахрейн аумағынан жүзеге асырылған.
Тегеран Вашингтонды Иранға қарсы әскери операция жүргізу үшін аймақ елдерінің аумағы мен инфрақұрылымын пайдалануда деп айыптап, Кувейт пен Бахрейн билігінің бұл шабуылдарға тікелей жауапты екенін мәлімдеді.
Иран тарапы бұл шабуылдар 8 сәуірде күшіне енген бітім режимін бұзғанын және мемлекеттердің аумақтық тұтастығы мен саяси тәуелсіздігіне қарсы күш қолдануға тыйым салатын халықаралық құқық нормалары мен БҰҰ Жарғысының 2-бабының 4-тармағына қайшы келетінін атап өтті.
Министрлік мәлімдемесінде: «Иранға қарсы әскери шабуыл жасауға немесе мұндай шабуылды қолдау мақсатында өз аумағын, әуе кеңістігін, теңіз айдындарын, нысандары мен әскери базаларын пайдалануға мүмкіндік берген кез келген мемлекет халықаралық құқықтың негізгі қағидаттары мен көрші елдердің принциптерін өрескел бұзады», – делінген.
Сондай-ақ министрлік БҰҰ Бас Ассамблеясының 3314-қарарына сәйкес мұндай әрекеттер Иранға қарсы жасалған агрессия актісі ретінде қарастырылатынын мәлімдеді.
Аймақтағы шиеленіс ақпан айының соңында АҚШ пен Израильдің Иранға жасаған әуе шабуылдарынан кейін күшейе түсті. Иранның мәліметінше, шабуылдар барысында елдің сол кездегі рухани көсемі Әли Хаменеи мен жоғары лауазымды әскери және мемлекеттік қызметкерлермен бірге 3 мыңнан астам адам қаза тапқан.
Пәкістанның араағайындығымен қол жеткізілген атысты тоқтату келісімі 8 сәуірде күшіне енгенімен, тараптар арасындағы жан-жақты келісімге қол жеткізу әрекеттері әзірге нәтиже берген жоқ.
