Түркия президенті Режеп Тайып Ердоған соңғы кезеңдегі өңірлік өзгерістер Түркия мен Еуропалық Одақ арасындағы қарым-қатынастың геосаяси маңызын тағы бір мәрте айқындағанын айтып, қазіргі жағдайға сай жаңартылатын Кеден одағы Түркияның Еуропалық Одаққа толық мүшелікке өту жолында жедел түрде ілгерілетуі қажет бағыттардың бірі екенін атап өтті.
Президент бұл мәлімдемені дүйсенбі күні Стамбулда Бельгия патшайымы Матильдамен өткізген кездесу барысында жасады. Түркия Президент аппараты жанындағы Коммуникация басқармасының хабарлауынша, кездесу барысында Түркия-Бельгия арасындағы екіжақты қатынас, сондай-ақ өңірлік және жаһандық мәселелер талқыланған.
Коммуникация басқармасы «X» әлеуметтік желісінде жариялаған мәлімдемеде: «Президент Ердоған Түркияның Еуропалық Одақтың қорғаныс бастамаларына қатысуы ортақ мүдделерімізге сай келетінін айтты», - деп хабарлады.
Ердоған сондай-ақ Түркия мен Бельгияның сауда, қорғаныс өнеркәсібі, энергетика және ауыл шаруашылығы сияқты көптеген салада елеулі ынтымақтастық әлеуетіне ие екенін айтып, екіжақты байланыстарды одан әрі нығайтуға бағытталған жұмыстардың жалғасатынын жеткізді.
Түркияның халықаралық аренадағы дипломатиялық рөлінің артып келе жатқанын атап өткен Ердоған елдің биыл 7-8 шілдеде Анкарада НАТО-ға мүше мемлекет басшыларының саммитін, ал 9-20 қараша аралығында «COP31» климат конференциясын өткізетінін айтты.
Түркия президенті жасыл энергетикаға көшу Бельгиямен ынтымақтастықтың маңызды бағыттарының бірі екенін айтып, Түркияның жаңартылатын энергия бойынша орнатылған қуат көлемі жөнінен Еуропаның жетекші елдерінің қатарында екенін атап өтті.
Ердоған кездесу барысында Бельгия патшайымы Матильданың түрік іскер топтарымен жасаған байланыстары нақты нәтижелерге ұласатынына үміт білдірді.
