Түркия осы жылдың соңында өтетін Біріккен Ұлттар Ұйымының Климаттың өзгеруі жөніндегі 31-конференциясын («COP31») өткізуге және оған төрағалық етуге дайындалып жатқан кезде, Қоршаған орта, урбанизация және климаттың өзгеруі министрлігі бейсенбі күні үкіметтік емес ұйымдарды бір араға жинады.
Анкара қаласындағы қонақүйде өткен іс-шараға министр әрі «COP31» төрағасы Мурат Курум жетекшілік етті. Кездесу «COP31» конференциясының дайындық жұмыстарына арналды.
Министр Курум «COP31» Төрағалық кеңсесінің құрылғанын, негізгі алаң ретінде Анталья «EXPO» орталығы белгіленгенін және қарқынды жұмыстардың басталғанын хабарлады. Анталия «EXPO» орталығы «COP31» өтетін басты орын болады.
Курум 12 ақпанда дайындық жұмыстары аясында Біріккен Ұлттар Ұйымының Климаттың өзгеруі жөніндегі негіздемелік конвенциясының хатшысы Саймон Стилмен кездескенін айтты.
Министр сондай-ақ келіссөз процесіне жетекшілік ететін Австралия, «COP30» өткен Бразилия және Әзербайжанның климат көшбасшыларымен Стамбул қаласында екі күндік кездесу өткізді.
Түркия 2026 жылдың қараша айында Австралиямен бірегей серіктестік келісімі аясында Анталия қаласында «COP31» конференциясын өткізеді.
«COP31»-дің ресми төрағасы ретінде Түркия іс-шараның логистикалық операцияларын, Әлем көшбасшылары саммитін, коммуникация және жалпы ұйымдастыру жұмыстарын басқарады.
Ал Австралия конференцияға дейін және конференция барысында келіссөздер процесінде айрықша өкілеттікке ие келіссөз төрағасы болады.
Түркия–Австралия серіктестігі 2025 жылдың қарашасында Бразилияның Белен қаласында өткен «COP30» барысында келісілген болатын.
«COP31»-ден үлкен нәтиже күтілуде
Министр Мурат Курум Анкарадағы кездесуде Түркияның «COP31»-ді жай дипломатиялық жиын емес, Париж келісімі аясында күшейтілген және жаңартылған Ұлттық деңгейде айқындалатын үлестер арқылы іске асыру үдерісі жеделдейтін, жаһандық сенім қайта қалпына келетін және нақты нәтижелерге қол жеткізілетін бетбұрыс кезеңі ретінде қарастыратынын атап өтті.
Курумның айтуынша, «COP» процестері мемлекеттер келіссөз үстеліне отыратын алаң болғанымен, бұл үдерістердің нәтижесі үкіметтік емес ұйымдардың рөліне тікелей байланысты.
Министр жиында геосаяси тектоникалық плиталарға, сондай-ақ энергетика, тау-кен өндірісі, сирек элементтер, жасанды интеллект және цифрлық егемендік салаларындағы күшейген бәсекеге назар аударды. Ол демографиялық өзгерістер, көші-қон, азық-түлік қауіпсіздігі мәселелері мен қаржылық тұрақсыздық сияқты жаһандық мәселелердің артып келе жатқанын айтты.
Түркияның маңызды миссиясы
Министр жаһандық климаттық күш-жігер аясында Түркияның маңызын атап өтіп, «Түркия климаттық әділеттілік және гуманитарлық дипломатия ұстанымдары арқылы даму жолын іздеген елдердің үні болады, сонымен қатар жасыл экономика, жасыл энергия, әділеттілік, шығын мен залал қоры сияқты бастамалар арқылы дамыған мемлекеттерді жауапкершілік алуға шақырады»,- деді.
Курум климат дағдарысымен күрес экономикалық дамуды шектемейтінін, әрі дамуға кедергі келтірмейтінін айтып, керісінше оның жаһандық деңгейде инклюзивті әл-ауқатты, теңдікті және тұрақты ілгерілеуді ынталандыратынын мәлімдеді.
Тараптар конференциясы ˗ 1995 жылдан бері климат саласындағы ілгерілеуді бағалау және іс-қимылдарды ұйымдастыру үшін жыл сайын бас қосатын БҰҰ-ның Климаттың өзгеруі жөніндегі негіздемелік конвенциясының (UNFCCC) ең жоғары шешім қабылдау органы.
«COP31» биыл қараша айында Түркияның Анталия қаласында өтеді, ал көшбасшылар саммиті Стамбулда ұйымдастырылады.
Түркияда өтетін бұл жиында Париж келісімін іске асыру қадамдары, жаңартылған шығарындыларды қысқарту мақсаттары, бейімделу шаралары, климаттық қаржыландыру және көміртек нарығының ережелері талқыланады. Кездесуге шамамен 200 ел қатысуы мүмкін.
