Президент Зеленский әлеуметтік желідегі жазбаша мәлімдемесінде Ресей мен Украина арасында 9–11 мамыр аралығында уақытша 3 күндік атысты тоқтату режимінен кейін майдан шебіндегі жағдайды жеткізді.
Ол Ресейдің түн ішінде Украинаға 200-ден астам қарулы дронмен шабуыл жасағанын айтып, «Майдан шебіне 80-нен астам әуе бомбасы тасталды, 30-дан астам әуе шабуылы тіркелді», - деді.
Зеленскийдің айтуынша, әуе шабуылдары Днипро, Киев, Житомир, Харьков, Сумы, сондай-ақ Николаев пен Чернигов облыстарын нысанаға алған.
«Ресей бірнеше күнге созылған ішінара атысты тоқтату режимін өзі тоқтатуға шешім қабылдады», - деді ол.
Зеленский Украина аймақтарына жасалған шабуылдар барысында энергетикалық нысандар, тұрғын үйлер, балабақша ғимараты және пойыз локомотиві соққыға ұшырағанын айтты.
«Бұл шабуылдардан жараланғандар бар. Өкінішке қарай, қаза тапқандар да бар», - деді Украина президенті.
Зеленский бұған дейін де Ресей шабуылдарына жауап беретіндерін айтқанын еске салып, «Ресей бұл соғысты тоқтатуы және тұрақты әрі ұзақ мерзімді атысты тоқтатуға бағытталған әрекет жасауы керек», - деп қосты.
Украина Әуе күштері қолбасшылығының жазбаша мәлімдемесінде Ресей армиясының түнде Украинаға 216 ұшқышсыз ұшу аппаратымен шабуыл жасағаны айтылды.
Мәлімдемеге сәйкес, әуе қорғаныс күштері 192 дронды жойған, ал қалғандары елдегі 10 түрлі нысанға түскен.
Атысты тоқтату процесі
Ресей президенті Владимир Путин бұған дейін 9 мамыр — Жеңіс күніне орай 8–9 мамыр күндері Украинада атысты тоқтату режимін жариялау туралы шешім қабылдаған еді.
АҚШ президенті Дональд Трамп та Ресей мен Украина арасында 9–11 мамыр аралығындағы әскери әрекеттерді уақытша тоқтатуды, сондай-ақ екі тараптың 1000 әскери тұтқынды алмастыруын қамтитынын хабарлаған болатын.
Ресей мен Украина да Трамптың бұл бастамасын қабылдағандарын хабарлаған еді.
