Иран сейсенбі күні АҚШ президенті Дональд Трамптың келіссөздерге шақыруына қатаң жауап беріп, Вашингтонның айыптауларын «негізсіз» деп атады.
Трамп Израиль парламенті Кнессетте сөйлеген сөзінде, Иран басшыларының террористерден бас тартып, көршілерін қорқытуды тоқтатуы, делдал жасақтарға қаржылай қолдауды доғару және Израильді мойындауы керектігін айтты. Ол бұл әрекеттердің аймақ үшін ең дұрыс шешім болатынын мәлімдеді. Сондай-ақ Трамп Иранның «келісімге келмейміз» дегеніне қарамастан, іс жүзінде АҚШ-пен бейбіт келісім жасағысы келетінін де айтты.
Иранның ресми ақпарат агенттігі «IRNA» Иран Сыртқы істер министрлігінің мәлімдемесін жариялады. Онда былай делінген: «Терорист, геноцид жасаушы, (Израиль) сионист режимнің демеушісі АҚШ-тың өзге елдерді айыптауға ешқандай құқығы жоқ». Сондай-ақ министрлік: «АҚШ пен сионистік режимнің Иран аумағына жасаған ортақ қылмыстарын ақтау мүмкін емес», - деді.
Израиль 13 маусымда Тегеранға шабуыл жасап, елдегі әскери, ядролық және азаматтық нысандарды, сонымен қатар жоғары лауазымды әскери қолбасшылар мен ядро саласының ғалымдарын нысанаға алған болатын.
Тегеран жауап ретінде Израильге зымыран және ұшқышсыз ұшақтармен соққы берді, ал АҚШ Иранның үш ядролық нысанын бомбалады. 12 күнге созылған қақтығыс 24 маусымда АҚШ қолдаған бітім келісімі арқылы аяқталды.
«Халықаралық әділдікке кедергі келтіру»
Иран Сыртқы істер министрлігі Вашингтонның Израильді жазасыз қалдырудағы рөлі үшін, сондай-ақ БҰҰ Қауіпсіздік Кеңесінде Израильге қарсы кез келген әрекетке тосқауыл қойып, израильдік қылмыскерлерді қудалауға бағытталған халықаралық сот үдерісіне кедергі жасағаны үшін жауап беруі керектігін айтты.
2023 жылдың қазан айынан бері Израиль шабуылдарынан 67 800-ден астам палестиналық қаза тапты. Олардың көпшілігі әйелдер мен балалар. Аймақтың басым бөлігі қирады. Израиль мен Хамас арасындағы атысты тоқтату жөніндегі келісімнің алғашқы кезеңі жұма күні күшіне енді.
