Дүйсенбі күні жарияланған мақалаға сәйкес, Біріккен Араб Әмірліктері АҚШ пен Израильдің Иранға қарсы жалғасып жатқан соғысы кезінде Иран аумағына қарсы бірқатар жасырын шабуыл ұйымдастырған.
Басылымның мәліметінше, нысаналардың бірі Лаван аралындағы мұнай өңдеу зауыты болған. АҚШ президенті Дональд Трамп Иранмен бітім жариялауға дайындалып жатқан тұста, сәуірдің басында жасалған бұл шабуыл ірі өртке себеп болып, зауыттың жұмысын тоқтатқан.
Иран бұған жауап ретінде Біріккен Араб Әмірліктері мен Кувейтке баллистикалық зымыран мен ұшқышсыз ұшу аппараттарын ұшырған. Дереккөздердің бірі АҚШ-тың бұл шабуылды құптағанын айтты.
Газеттің ақпаратына сйкес, Иран Біріккен Араб Әмірліктерін көбірек нысанаға алып, 2 800-ден астам зымыран және дрон шабуылын жасаған.
Шабуылдар БАӘ экономикасына елеулі зиян келтіріп, қысқартуларға, ақысыз демалыстарға және елдің стратегиялық көзқарасының түбегейлі өзгеруіне себеп болды.
Аты-жөнін атамаған Парсы шығанағы елдерінің шенеуніктері Иранның енді Біріккен Араб Әмірліктерінің шетелдік жұмыс күшіне, сондай-ақ қауіпсіздік пен тұрақтылыққа негізделген экономикалық және әлеуметтік моделіне нұқсан келтіруге тырысатын «бұзақы мемлекет» ретінде қабылданатынын мәлімдеген.
Біріккен Араб Әмірліктерінің Сыртқы істер министрлігі бұл ақпарат туралы газеттің сұрағына жауап бермеген. Алайда дұшпандық әрекеттерге жауап қайтару құқығын атап өткен мәлімдемеге сілтеме жасаған.
Таяу Шығыс жөніндегі сарапшы Дина Эсфандияридің айтуынша, Парсы шығанағындағы араб елдерінің бірінің Иранға тікелей соққы жасауы ̶ маңызды оқиға. Енді Тегеран соғысты тоқтату үшін араағайын болуға тырысқан Біріккен Араб Әмірліктері мен басқа да Парсы шығанағы елдерінің арасына одан әрі жік салуға ұмтылады.
