Украина президенті Владимир Зеленский “Reuters” агенттігіне берген сұхбатында АҚШ-тың Украинаға ұсынған қауіпсіздік кепілдіктері жөніндегі ұсынысын Киевтің Донбасстың шығыс бөлігін толықтай Ресейге беруімен байланыстырып отырғанын айтты.
Зеленский Вашингтон 2022 жылы басталған соғыстың тезірек аяқталуын қалайтындықтан Украинаға қысым жасап отырғанын, ал Таяу Шығыстағы соғыс АҚШ-тың басымдықтарына әсер еткенін жеткізді.
Ол: «Таяу Шығыс Трампқа сөзсіз әсер етіп отыр… соған қарамастан ол Украина жағына бұрынғыдан да көбірек қысым жасау стратегиясын таңдауда», - деді.
Биыл АҚШ, Ресей және Украина Абу-Даби мен Женевада үш рет үшжақты келіссөз өткізді.
Зеленский Украинаға әскери қажеттіліктерді кім қаржыландыратыны және одақтастардың болашақтағы Ресей агрессиясына қалай жауап беретіні секілді екі негізгі мәселенің әлі шешілмегенін айтты.
Ол: «Америкалықтар Украина Донбасстан шегінуге дайын болған жағдайда бұл кепілдіктерді жоғары деңгейде түпкілікті рәсімдеуге әзір», — деді.
Ресей Донбассты толық бақылауға алу оның соғыстағы негізгі мақсаттарының бірі екенін айтып келеді. Алайда сарапшылар бұл бағыттағы ілгерілеу баяу жүріп жатқанын айтады.
Зеленский мұндай шегіну Украина мен Еуропаны әлсірететінін ескертіп, «Америка тарапы біздің елдің шығыс бөлігі қауіпсіздік кепілдіктеріміздің ажырамас бөлігі екенін түсінсе екен деймін», — деп мәлімдеді.
Келіссөздер белгісіз күйде
Ирандағы соғысқа байланысты келіссөздердің төртінші кезеңі кейінге шегерілді.
Зеленскийдің айтуынша, Ресей келіссөздер тығырыққа тірелген жағдайда Вашингтон қызығушылығын жоғалтады деп есептейді. Осыған байланысты ол негізгі мәселелерді шешу үшін АҚШ президенті Дональд Трамп пен Ресей президенті Владимир Путиннің қатысуымен саммит өткізуді ұсынды.
