Түркия Сыртқы істер министрлігінің дереккөздерінің мәліметіне сәйкес, Сыртқы істер министрі Хакан Фидан 21-22 мамыр күндері Швецияның Хельсингборг қаласында өтетін НАТО Сыртқы істер министрлері кездесуіне қатысады.
Кездесуде 7-8 шілде күндері Анкарада өтетін НАТО саммитіне дайындық мәселелерімен қатар одақ ішіндегі бірлік, трансатлантикалық ынтымақтастық, қорғаныс өнеркәсібінің өндірістік әлеуетін күшейту, Украинаға қолдау көрсету және артқан қорғаныс шығындарын әскери әлеуетке айналдыру мәселелеріне басымдық берілмек.
Министрлер сондай-ақ Иран мен Ормуз бұғазына қатысты соңғы оқиғаларды, олардың Еуро-Атлантикалық қауіпсіздікке ықпалын және бірқатар мәселені талқыламақ.
Кездесу 21 мамыр күні Украина Сыртқы істер министрі Андрий Сыбига мен Еуропалық Одақтың Сыртқы істер және қауіпсіздік саясаты жөніндегі жоғары өкілі Кая Калластың қатысуымен НАТО-Украина кеңесінің бейресми кешкі асымен басталады.
Кешкі ас барысында Фидан Түркияның Украинаның тәуелсіздігіне, егемендігіне және аумақтық тұтастығына қолдауын тағы бір мәрте растап, Анкараның Ресей-Украина соғысын тоқтатуға бағытталған дипломатиялық күш-жігеріне назар аудармақ.
Анкара саммитіне дайындық
Бұл кездесу 22 мамыр күні тек НАТО-ға мүше 32 елдің Сыртқы істер министрлері қатысатын отырыспен жалғасады.
Хакан Фидан НАТО Сыртқы істер министрлерінің соңғы кездесуінде одақтастарына Анкара саммитіне дайындық жұмыстары туралы ақпарат береді.
Фидан Түркияның НАТО-ға үлесі туралы мәлімет беріп, елдің қорғаныс шығындарын әскери әлеуетке айналдыру бағытындағы қадамдарын атап өтеді. Сонымен қатар ол одақ аясындағы трансатлантикалық қорғаныс өнеркәсібі ынтымақтастығын ешқандай шектеусіз дамыту қажеттігін жеткізбек.
Министр НАТО барлық бағыттан келетін қауіпке қарсы тұру үшін «360 дәрежелік қауіпсіздік» тәсілінің маңызын, одақтың оңтүстіктегі көршілерімен ықпалдастықты тереңдету мен терроризмге қарсы күресті күшейту қажеттігін де атап өтпек.
