Алжир парламенті Алжирдің Франция тарапынан отарлануын қылмыс деп танитын және ресми кешірім мен өтемақы талап ететін заңды бірауыздан қабылдады.
Депутаттар отырыс кезінде мемлекеттік ту түстес шарфтар тағып, заң жобасының қабылдануын қол шапалақтап қарсы алды және «Жасасын Алжир!» деп ұрандатты. Заң жобасында Францияның Алжирдегі отаршылдықтың өткені мен отаршылдық қасіретіне Францияның құқық алдында жауап беруі керек екені атап көрсетілген.
Парламент төрағасы Брахим Бугали дауыс беру алдында «APS» мемлекеттік ақпарат агенттігіне бұл заң Алжирдің ұлттық жадын өшіру мүмкін еместігін және ол ешқашан саудаланбайтынын ашық жеткізетінін айтты.
Аталған заңда ядролық сынақ, сотсыз жазалау, зорлық-зомбылық пен психологиялық азаптау, ел ресурстарын жүйелі түрде тонау сияқты француз отаршылдығының қылмыстары тізбектеліп көрсетілген.
Заңда сондай-ақ «француз отаршылдығы салдарынан келтірілген барлық материалдық және моральдық зиян үшін толық әрі әділ өтемақы алу ˗ Алжир мемлекеті мен халқының құқығы» екені нақты жазылған.
Адамзатқа қарсы қылмыс
Францияның 1830 жылдан 1962 жылға дейін Алжирді басқарғаны ˗ екі ел арасындағы қарым-қатынаста әлі де негізгі мәселе.
Бұл кезең қырғын және депортациялармен, сондай-ақ 1954 және 1962 жылдар аралығындағы қанды тәуелсіздік соғысымен ерекшеленеді.
Алжир соғыста 1,5 миллион адам қаза тапты деп мәлімдесе, француз тарихшылары жалпы өлім санын 500 000 деп бағалады (оның 400 000-ы алжирліктер).
Франция президенті Эммануэль Макрон бұған дейін Алжирді отарлауды «адамзатқа қарсы қылмыс» деп таныған, бірақ ресми түрде кешірім сұраудан бас тартқан.
Өткен апта Франция Сыртқы істер министрлігінің өкілі Паскаль Конфавре дауыс беруге қатысты тілшілерге «шетелдегі саяси пікірталастар» туралы түсініктеме бермейтінін айтты.
