Батыс елдерінен құралған ондаған мемлекет дүйсенбі күні Газа мен Израиль басып алған Батыс Шерия арасында медициналық дәлізді қайта ашуға шақырды. Елдер Газа тұрғындарының Батыс Шерияда ем қабылдауы үшін қаржылай көмек, медицина қызметкерлері немесе қажетті жабдықтарды ұсынатынын жеткізді.

Канада жариялаған ортақ мәлімдемеде: «Біз Израильді басып алынған Батыс Шерия мен Шығыс Иерусалимге медициналық дәлізді қайта ашуға шақырамыз. Осылайша Газадан медициналық эвакуация қайта басталып, науқастар Палестина территориясында шұғыл түрде қажет ем ала алады», - делінген.

Австрия, Бельгия, Канада, Франция, Германия, Италия, Еуропалық Одақ және Польша мәлімдемеге қол қойса, АҚШ қол қоймады. Мәтінде сондай-ақ: «Біз Израильді Газаға дәрі-дәрмек пен медициналық жабдық жеткізуге қойылған шектеулерді алып тастауға шақырамыз», - делінген.

Көмек ұйымдарының айтуынша, тамыз бен мамыр айында Израиль гуманитарлық көмекке қойылған шектеуді алып тастаса да, дәрі-дәрмекпен бірге қажетті көмектің Газаға тек шектеулі мөлшерде жеткені белгілі болды.

Дүниежүзілік денсаулық сақтау ұйымы (ДДСҰ) мамыр айында Газа денсаулық сақтау жүйесі күйреу шегінде тұрғанын жариялаған еді.

Израиль Газада барлық кірісті бақылап, аймаққа жеткілікті азық-түлік пен материал жеткізіліп жатқанын алға тартады.

Аштыққа ұшыраған палестиналықтардың әсіресе балалардың суреттері әлемде ашу-ыза тудырды. Көптеген адам құқықтары жөніндегі сарапшы, ғалымдар және БҰҰ бұл жағдайды геноцид деп бағалап отыр.

АҚШ-тың мақұлдамауына қарамастан, Ұлыбритания мен Франция сияқты кейбір маңызды одақтастар БҰҰ-да екі мемлекет негізіндегі шешім аясында Палестинаны мемлекет ретінде тануды қолдады.