Израильдік дереккөздердің хабарлауынша, Иранның зымыран шабуылдарының салдарынан Израильде кемінде 12 адам қаза тауып, 150-ден астам адам жарақат алған.
Израильдің «Iron Dome» (Темір күмбез), «David’s Sling» (Дәуіттің салбыры) және «Arrow» (Жебе) жүйелерін қамтитын дамыған көпқабатты әуе шабуылына қарсы қорғаныс жүйелері зымырандардың басым бөлігін тойтарған. Алайда бірнеше зымыранның тікелей түсуі адам шығынына әкелді.
Ең қанды шабуыл жексенбі күні Иерусалимнің батысындағы Бейт-Шемеш қаласында болды: ирандық баллистикалық зымыран бір тұрғын ауданға тікелей соққы берді.
Израильдің ұлттық жедел медициналық қызметі “Magen David Adom” (MDA) қаза тапқандар саны әуелі алтыдан сегізге, кейін тоғызға жеткенін, ондаған адамның жараланғанын және кемінде екі адамның жағдайы ауыр екенін хабарлады.
“The Times of Israel” басылымы Бейт-Шемеште қаза тапқандар саны тоғызға жеткенін хабарлады.
Ал “The Jerusalem Post” газеті шабуыл салдарынан тоғыз израильдік қаза тапқанын, сондай-ақ қираған ғимараттар арасында жараланғандар мен хабар-ошарсыз кеткендер бар екенін жазды.
Бұған дейін сенбі түнінде Тель-Авив аймағына зымыран шабуылы жасалды. “Magen David Adom” мен басқа да деректерге сәйкес, екі әйел қаза тауып, 120-дан астам адам жараланған.
Израильдің Ішкі тыл қолбасшылығы орталық және солтүстік аймақтарда дабыл сиреналары қосылғанын айтып, тұрғындарды сақ болуға шақырды.
