Иран Cыртқы істер министрі Аббас Аракчи жұма күні Оманда АҚШ-пен өтетін келіссөз алдында Тегеранның дипломатияны ізгі ниетпен жүргізіп жатқанын айтып, міндеттемелер орындалуы тиіс екенін атап өтті.
Аракчи «X» желісіндегі жазбасында «Иран дипломатияға ашық және өткен жылдың ауыр тәжірибесімен кірісіп отыр. Біз ізгі ниетпен әрекет етеміз және өз құқықтарымызды қорғауда табандымыз»,- деді.
«Міндеттемелер сақталуы керек», - деген Аракчи тең мәртебе, өзара құрмет және ортақ мүдделер міндетті, әрі тұрақты келісімнің негізі екенін атап өтті.
Вашингтон мен Тегеран жұма күні Оманда ядролық келіссөз өткізуді жоспарлап отыр. Келіссөзге АҚШ тарапынан Джаред Кушнер мен АҚШ-тың арнайы елшісі Стив Уиткофф өкілдік етеді. Ал Ираннан Аракчи жетекшілік ететін делегация өкілдік етеді. «Tasnim» агенттігі Иран Сыртқы істер министрінің келіссөз үшін Оман астанасы Маскатқа жеткенін хабарлады.
Апта басында келіссөздерге күмән болғанымен, Ақ Үй өкілі Анадолы агенттігіне келіссөздің өтетінін растады.
Жоспарланған кездесу Парсы шығанағында АҚШ әскери күштерінің артуы мен желтоқсан соңында Иранда басталған наразылықтардан кейін, сондай-ақ АҚШ президенті Дональд Трамптың әскери операция туралы ескертулерінен соң Вашингтон мен Тегеран арасындағы шиеленіс күшейген кезде өтпек.
Соңғы күндері шиеленісті азайту мақсатында бірқатар ел Тегеран мен Вашингтон арасында араағайын болуға ниет білдірді. Бұл бағытта әсіресе Түркия белсенді рөл атқарды.
АҚШ пен оның одақтасы Израиль Иранды ядролық қару жасауға ұмтылып отыр деп айыптаса, Тегеран ядролық бағдарламасының бейбіт мақсаттарға, соның ішінде электр энергиясын өндіруге бағытталғанын мәлімдейді.
