Сәрсенбі күні Елисей сарайы Францияның Гренландияда НАТО-ның әскери оқу-жаттығуын өткізуді ұсынғанын және үлес қосуға дайын екенін мәлімдеді. АҚШ президенті Дональд Трамп аралды бақылауға алатынын айтып, қоқан-лоққы көрсеткен болатын.
Дания Корольдігіне қарайтын Гренландия автономиялық аймағы стратегиялық тұғыры мен мол минералды ресурстарына байланысты Трамптың қызығушылығын туғызды. Ресей мен Қытайдың белсенділігі артқаны жөніндегі алаңдаушылық та оған қатты әсер етті.
Трамп аралды алу үшін күш қолдануды жоққа шығармайтынын айтып, талабын қолдайтын мемге ұқсас суреттер жариялады. Ал Дания мен Гренландия сату туралы ұсыныстарды қабылдамай, Данияның аймақтағы егемендігін қайта растады.
Франция, Дания, Швеция және Германия оқу-жаттығулары мен барлау миссиялары арқылы Гренландиядағы әскери күшін арттырып жатқанда Трамп «Өңір Ресей мен Қытайға қарсы тұру үшін АҚШ-тың қолында болуы тиіс»,- дейді.
Сенбі күні Трамп Вашингтон 1 ақпаннан бастап Дания, Норвегия, Швеция, Франция, Германия, Ұлыбритания, Нидерланд және Финляндиядан келетін тауарларға 10 пайыздық кедендік баж салығын енгізетінін, ал маусым айында бұл мөлшерлеме 25 пайызға дейін артатынын айтты. Оның сөзінше, бұл Гренландияны толық сатып алғанға дейін жалғасады.
Бұған жауап ретінде Еуропа көшбасшылары Трамптың кедендік баж салығы туралы қоқан-лоққысын қабылдамай, Даниямен ынтымақтастықты тағы да растады.
