АҚШ президенті Дональд Трамп тойтарыс тобы ХАМАС-тың 13 қазанда Газадағы барлық израильдік тұтқынды босататынын мәлімдеді.
Трамп сәрсенбі күні Израиль мен ХАМАС арасында жасалған келісімнен кейін, израильдік тұтқындардың отбасыларымен телефон арқылы сөйлесті. Тұтқындардың туыстары келісімге қол жеткізу жолындағы күш-жігері үшін Трампқа алғыс білдірді.
Телефон әңгімесі барысында Трамп барлық израильдік тұтқындардың дүйсенбі күні босатылатынын айтты. АҚШ президенті «X» платформасында жариялаған жазбасында «БАРЛЫҚ» израильдік тұтқындардың босатылатынын ерекше атап өтті. Алайда Трамп босатылатындар арасында қаза тапқан тұтқындардың мәйіттері бар-жоғы туралы мәлімдеме жасаған жоқ.
Бұған дейін Трамп Израиль мен ХАМАС АҚШ ұсынған Газа жөніндегі келісімнің алғашқы кезеңін қабылдағанын хабарлаған болатын.
29 қыркүйек күні ұсынылған 20 тармақтан тұратын бұл жоспар тұтқын алмасуды, атысты тоқтатуды, ХАМАС-ты қарусыздандыруды және Газаны қайта қалпына келтіруді қамтиды.
2023 жылдың қазан айынан бері Газада 67 200 палестиналық қаза тапты. Олардың көпшілігі әйелдер мен балалар. Үздіксіз әуе шабуылдары аймақты өмір сүруге жарамсыз етіп, жаппай көші-қонға, ашаршылық пен түрлі аурулардың таралуына себеп болды.
