АҚШ президенті Дональд Трамптың Газаға арналған жоспарының алғашқы кезеңіне қатысты келісімге бейсенбі күні сағат 09:00 GMT-де қол қойылуы күтілуде. «Reuters» агенттігіне сұхбат берген дереккөздің хабарлауынша, келісімге қол қойылғаннан кейін Газа аймағында атысты тоқтату күшіне енуі тиіс.
«The Jerusalem Post» басылымының мәліметінше, Катар, Мысыр, АҚШ және Түркия Газа бейбітшілік келісімінің кепілгерлері ретінде құжатқа қол қойған.
Израиль мен палестиналық тойтарыс тобы ХАМАС Тель-Авивтің Газадағы соғысын тоқтатуға бағытталған көптен күткен атысты тоқтату келісімінің алғашқы кезеңі бойынша мәмілеге келгендерін мәлімдеді. Бұл соғыс 67 мыңнан астам палестиналықтың өмірін қиып, Таяу Шығыстың саяси бейнесін түбегейлі өзгертті.
Алайда Газа Азаматтық қорғаныс агенттігі Израиль мен ХАМАС атысты тоқтату жоспары бойынша келісімге келгеннен кейін көп ұзамай аймақта бірқатар шабуылдың болғанын хабарлады.
Агенттік өкілі Мұхаммед әл-Мугхайир: «Кеше түнде Газада атысты тоқтату келісімі жарияланғаннан кейін Газаның солтүстік аймақтарында бірнеше жарылыс болды», – деді. Сондай-ақ ол Газа қаласына ауқымды әуе соққылары жасалғанын мәлімдеді.
Израиль армиясы бейсенбі күнгі мәлімдемесінде аймақтағы әскерлердің өз позицияларында қалып отырғанын және ықтимал операцияларға дайындық жүргізіп жатқанын хабарлады.
Бұл жағдай «Reuters» агенттігінің дереккөзіне сүйенген тағы бір хабармен тұспа-тұс келді. Онда Израильдің қауіпсіздік кабинеті мен үкіметі Газа келісіміне байланысты отырыстарын екі сағатқа шегеріп, оны сағат 14:00 GMT-ге ауыстырғаны айтылған.
Келісім үш негізгі тармақты қамтиды: израильдік тұтқындар мен палестиналық тұтқындардың босатылуы, Израиль әскерінің шегінуі, жылдар бойы созылған блокада мен соғыстан кейін Газаға аса қажетті гуманитарлық көмектің тез арада жеткізілуі.
«AFP» агенттігіне сұхбат берген ХАМАС дереккөзіне сәйкес, тойтарыс тобы келісімнің алғашқы кезеңі аясында 20 израильдік тұтқынды шамамен 2000 палестиналық тұтқынмен алмастырады. Келіссөздерге қатысқан өзге бір дереккөз бұл тұтқын алмасу келісімге қол қойғаннан кейін 72 сағат ішінде жүзеге асатынын мәлімдеді. Дереккөздің айтуынша, босатылатын израильдіктердің орнына 1700 палестиналық пен өмір бойына бас бостандығынан айрылған 250 адам босатылады. Араларында әйелдер мен балалар да бар.
