Түркия Сыртқы істер министрлігі дереккөздерінің мәліметінше, Иранның Сыртқы істер министрі Аббас Аракчи жұма күні түрік әріптесі Хакан Фиданмен кездесу үшін Түркияға келеді. Екі көрші ел қауіпсіздік, сауда және бірқатар өңірлік мәселелер бойынша ынтымақтастықты тереңдетуді мақсат етіп отыр.
Түркия Сыртқы істер министрінің Анкараның Ирандағы соңғы оқиғаларды мұқият бақылап отырғанын және Иранның қауіпсіздігі, тыныштығы мен тұрақтылығы Түркия үшін аса маңызды екенін жеткізуі күтілуде.
Министрлік дереккөздеріне сәйкес, Фидан Түркияның Иранға қарсы кез келген әскери операцияға қарсы екенін қайталап, мұндай қадам аймақтық және жаһандық қауіп туғызуы мүмкін екенін ескертпек.
Фидан сондай-ақ Анкараның диалог арқылы қазіргі шиеленісті бәсеңдетуге, Тегеранның ядролық бағдарламасына байланысты мәселені жедел, әрі бейбіт жолмен шешуге және қажет болған жағдайда Түркия қолдау көрсетуге дайын екенін жеткізеді.
Анкара ынтымақтастықты арттырғысы келеді
Хакан Фидан тарихи байланыстармен астасқан екі ел Түркия мен Иран арасындағы қатынастардың өңірлік қауіпсіздік, тұрақтылық және әл-ауқат үшін аса маңызды екенін атап өтеді.
Түркия Сыртқы істер министрі сондай-ақ 2014 жылы құрылған Түркия-Иран Жоғары деңгейлі ынтымақтастық кеңесі сияқты қолданыстағы тетіктер арқылы ынтымақтастықты одан әрі нығайтқысы келетінін мәлімдемек.
Келіссөздердің негізгі бағыты екіжақты сауданы 30 миллиард долларға жеткізу болмақ.
Фидан Түркияның сауда, энергетика, көлік және байланыс салаларында ынтымақтастықты кеңейтуге деген ниетін жеткізеді.
Терроризмге қарсы ынтымақтастық
Кездесуде сондай-ақ қауіпсіздік саласындағы ынтымақтастық талқыланады. Хакан Фидан PKK террористік ұйымының Ирандағы тармағы саналатын PJAK-тың соңғы оқиғалардағы рөлін атап өтіп, Иранның қауіпсіздігі үшін бұл ұйымды толық, әрі шұғыл түрде бейтараптандыру қажеттігін мәлімдемек.
Кездесуде Иран шекарасынан тыс аймақтық дағдарыстар да талқыланады.
Фидан сондай-ақ Анкараның палестиналықтардың өз жерінде қалып, бейбітшілік пен қауіпсіздік жағдайында өмір сүруіне мүмкіндік беретін Газаны қайта қалпына келтіруге қолдауын тағы да растайды.
Хакан Фидан Израильдің өңірлік тұрақтылыққа нұқсан келтіретін әрекеттеріне қарсы аймақ елдерін ынтымақ пен бірлік аясында әрекет етуге шақырмақ.
Сириядағы бейбітшілік пен қауіпсіздік
Хакан Фидан сондай-ақ Сирияда бейбітшілік пен қауіпсіздікті нығайту өңірлік тұрақтылықты да күшейтетінін атап өтеді.
Министр Сирияның аумақтық тұтастығын, бірлігін және егемендігін сақтау үшін атысты тоқтату және толық интеграция туралы келісімнің маңызын ерекше атап, ДАИШ-қа қарсы күрестің әлсіреуіне жол бермеу үшін бітімді сақтау қажеттігін мәлімдейді.
Түркия мен Иран соңғы рет 2024 жылдың қаңтарында Анкарада Режеп Тайып Ердоған мен марқұм Иран президенті Ибрахим Раисидің тең төрағалығымен Жоғары деңгейлі ынтымақтастық кеңесінің 8-отырысын өткізген.
Президент Ердоған 2025 жылдың қыркүйегінде Қытайдағы Шанхай ынтымақтастық ұйымы саммитінде Иран президенті Масуд Пезешкианмен кездескен болатын.
