Түркия Республикасының Сыртқы істер министрі Хакан Фидан АҚШ-тың Иранға қарсы ықтимал шабуылы «қате» болатынын айтып, Вашингтон мен Тегеранды келіспеушіліктерін дипломатия жолымен шешуге шақырды.
Фидан сәрсенбі күні “Al Jazeera” арнасына берген сұхбатында Иранмен шиеленіс күшейген тұста АҚШ-тың Таяу Шығысқа әскери күштер жіберуіне назар аударып, «Соғысты қайта бастау – қате», - деді.
Екі ел арасындағы қатаң риторикаға қарамастан дипломатиялық шешім әлі де мүмкін екенін баса айтқан Фидан «Иран ядролық мәселе бойынша қайтадан келіссөз жүргізуге дайын», – деді.
Фидан АҚШ шенеуніктеріне Иранға қатысты мәселелерді кезең-кезеңімен қарастыруды ұсынды. «Америкалық достарға кеңесім – Иранмен байланысты мәселелерді кезең-кезеңімен жабу. Ядролық мәселеден бастаңыздар, оны жабыңыздар, содан кейін басқаларына көшіңіздер», – деді ол.
«Барлық тақырыпты бір ғана пакет ретінде ұсынсаңыздар, ирандық достарымыз үшін мұны қабылдау, шынымен өңдеу және іске асыру өте қиын болады», – деген Фидан: «Кейде бұл оларға қорлайтындай болып көрінуі мүмкін. Мұны тек өздеріне ғана емес, басшылыққа да түсіндіру қиын», – деп қосты.
Сыртқы істер министрі Фидан сондай-ақ Иранның өңірлік тәртіпте «өте жақсы орын» ала алатынын, алайда ол үшін көрші елдермен сенім қалыптастыруы қажет екенін айтты. «(Ирандықтар) өңірде сенім орнатуы керек», – деді ол және: «Өңір елдерінің өзін қалай қабылдайтынына назар аударуы тиіс. Өйткені олар ешқайда кетпейді, біз де ешқайда кетпейміз», – деп толықтырды.
Түркия Сыртқы істер министрі Фидан әртүрлі идеологияға қарамастан өңір елдері ынтымақтастық жасауға мәжбүр екенін де атап өтті.
