Дүниежүзілік банк Украинаны қайта қалпына келтіруге арналған шығындар жөніндегі есебін жаңартып, бұл көрсеткішті алдыңғы есептегі 524 миллиард доллар деңгейінен өткен жылдың соңындағы жағдай бойынша 588 миллиард долларға дейін шығарды.
Дүйсенбі күні жарияланған мәлімдемеде Ресеймен соғыс басталғалы бері өткен төрт жылда жаңартылған он жылдық шығын көлемі 2025 жылы Украинаның жалпы ішкі өнімінің шамамен үш есесіне тең келетіні атап өтілді.
Банк таратқан хабарламада: «Даму серіктестерінің қолдауымен Украина үкіметі 2026 жылға арналған қалпына келтіру және қайта құру басымдықтарын қамтамасыз ету үшін маңызды қадам басып жатыр. Олардың қатарында мемлекеттік инвестициялық жобаларды және қираған тұрғын үйлерді қаржыландыру, миналарды тазалау, сондай-ақ көпсалалы экономикалық қолдау бағдарламалары сияқты негізгі қалпына келтіру бастамалары бар. Бұл бағдарламалардың жалпы көлемі 15 миллиард доллардан асады», – делінген.
Банк мәліметінше, 2022 жылдың ақпан айынан бері тұрғын үй, энергетика, білім беру, көлік және басқа да негізгі секторда жүргізілген шұғыл жөндеу жұмыстары мен ерте қалпына келтіру шаралары арқылы кемінде 20 миллиард доллар көлеміндегі қажеттіліктер өтелген.
Сонымен қатар тікелей залал көлемі бұрынғы есепте 176 миллиард доллар болса, қазір 195 миллиард доллардан асып түскені, ал ең көп зардап шеккен салалар тұрғын үй, көлік және энергетика екені атап өтілді.
Қайта қалпына келтіру және оңалту
Ашық деректерде энергетика секторында өткен жылғы есеппен салыстырғанда зақымданған немесе жойылған активтер саны шамамен 21%-ға артқаны, ал көлік секторындағы қажеттіліктер сол кезеңде шамамен 24%-ға өскені айтылған.
Банк сондай-ақ өткен жылдың соңындағы жағдай бойынша тұрғын үй қорының 14%-ы зақымданғанын немесе толығымен жойылғанын, бұл 3 миллионнан астам үй шаруашылығына әсер еткенін хабарлады.
Дүниежүзілік банктің бағалауынша, қайта қалпына келтіру мен оңалтуға ең көп қаржы қажет ететін сала — көлік секторы. Бұл саланың бюджеті 96 миллиард доллардан асады. Одан кейін шамамен 91 миллиард доллармен энергетика секторы және 90 миллиард долларға жуық көрсеткішпен тұрғын үй секторы тұр. Сауда және өнеркәсіп саласындағы қажеттілік 63 миллиард доллардан асса, ауыл шаруашылығында бұл көрсеткіш 55 миллиард доллардан жоғары.
Сонымен қатар залалды шектеуге көмектесіп жатқан зерттеу және миналарды тазалау жұмыстарының ілгерілеуіне қарамастан жарылғыш заттар қаупін басқару мен үйінділерді тазалаудың құны шамамен 28 миллиард доллар болады деп болжанып отыр.
