Украина мен Ресей өкілдері сейсенбі және сәрсенбі күндері Женевада АҚШ-тың арағайындығымен өтетін жаңа бейбіт келіссөздер раундына жиналады. Кремль бұл кездесуде негізінен аумақ мәселесіне назар аударылуы мүмкін екенін мәлімдеді.
АҚШ президенті Дональд Трамп 1945 жылдан бергі Еуропадағы ең ірі соғыс саналып отырған қақтығысты тоқтату үшін Мәскеу мен Киевті келісімге келуге итермелегісі келеді. Украина президенті Владимир Зеленский өз елінің ымыраға келуі үшін бұрын-соңды болмаған күшті қысымға тап болғанын айтты.
Ресей Мәскеу толық бақылауына ала алмаған шығыстағы Донецк облысының қалған 20 пайызын талап етуде, ал Киев бұл талапты қабылдамай отыр.
Келіссөздер өтетін орын Абу-Дабиден Женева қаласына ауыстырылды. Бұған дейінгі екі раундты тараптар «сындарлы» деп бағалағанымен, айтарлықтай ілгерілеу болмаған еді.
Елеулі ілгерілеуге үміт аз
Кремль Ресей делегациясын президент Владимир Путиннің кеңесшісі Владимир Мединский басқаратынын хабарлады.
Кездесуге әскери барлау басшысы Игорь Костюков та қатысады, ал Путиннің арнайы өкілі Кирилл Дмитриев экономикалық мәселелерді талқылайтын бөлек жұмыс тобының құрамында болады.
Сенбі күні Мюнхен қауіпсіздік конференциясында сөйлеген Зеленский Женевадағы келіссөздердің «байыпты әрі мазмұнды» болатынына үміт білдіріп, «бірақ шынын айтсам, кейде тараптар мүлде әртүрлі нәрселер туралы сөйлесіп жатқандай көрінеді», — деді.
Киев делегациясын Украина Ұлттық қауіпсіздік және қорғаныс кеңесінің хатшысы Рустем Умеров пен Зеленскийдің бас кеңесшісі Кирило Буданов басқарады. Президенттің жоғары деңгейдегі көмекшісі Сергей Кислица да келіссөзге қатыспақ.
Женеваға аттанар алдында Умеров Украинаның «тұрақты және ұзақ мерзімді бейбітшілікке» қол жеткізу мақсаты өзгермегенін айтты.
