Түркия Израильдің Газаға гуманитарлық көмек жеткізуге ұмтылған жаһандық «Sumud» флотилиясына жасаған шабуылын қатаң айыптап, оны бейбіт тұрғындардың өмірін қауіпке тіккен «террорлық әрекет» деп атады.
Сыртқы істер министрлігінің мәлімдемесінде: «Зорлық-зомбылықсыз бейбіт мақсатта әрекет еткен азаматтарды нысанаға алған бұл шабуыл – Газаны аштыққа душар еткен геноцидшіл Нетаньяху үкіметінің фашистік әрі милитаристік саясатының тек палестиналықтармен шектелмей, Израиль зұлымдығына қарсы күрескен баршаға бағытталған», – делінген.
Сонымен қатар мәлімдемеде: «Израиль күштері ұстап әкеткен азаматтарымыз бен өзге де жолаушылардың тез арада босатылуы үшін қажетті қадам басылуда», – делінді.
Жаһандық «Sumud» флотилиясы делегациясынан жауап
«Sumud» флотилиясының Түркия делегациясы да Израильдің халықаралық суларда қарусыз гуманитарлық көмек қызметкерлеріне жасаған заңсыз шабуылын айыптады.
Делегацияның мәлімдемесінде, Израиль әскерлері жергілікті уақыт 20:30 шамасында «Alma», «Sirius» және «Adara» кемелеріне заңсыз басып кіргені, кемелердің байланыс арналарын әдейі бұзып, көмек шақыру мүмкіндігінен айырғаны атап өтілді.
Сондай-ақ «Бірнеше кеме тоқтатылса да, жаһандық «Sumud» флотилиясы әлі де Газа жағалауынан 60 теңіз милі қашықтықта сапарын жалғастыруда», – делінген.
Делегация үкіметтерді, әлем көшбасшылары мен халықаралық ұйымдарды кемедегілердің қауіпсіздігін қамтамасыз етіп, ұсталған азаматтардың тез арада босатылуы үшін әрекет етуге және жағдайды жіті қадағалауға шақырды.
Бұл оқиға Түркия мен өзге де мемлекеттер заңсыз деп таныған Израильдің Газаға бағытталған геноцидін қайтадан күн тәртібіне шығарды. Анкара бірнеше рет халықаралық қоғамдастықты көмек керуендерін қорғауға және гуманитарлық жүктің еш кедергісіз аймаққа жеткізілуін қамтамасыз етуге үндеу жасаған болатын.
Ресми өкілдердің мәліметінше, флотилиядағы еріктілер арасында азаматтары бар өзге елдермен және гуманитарлық ұйымдармен үйлесімді түрде жұмыс жүргізілуде.
