Ресейдің бас келіссөз жүргізушісі Владимир Мединский сәрсенбі күні жасаған мәлімдемесінде АҚШ-тың араағайындығымен Ресей мен Украина арасында Женевада өтіп жатқан бейбіт келіссөздердің қиын, алайда кәсіби әрі ресми сипатта өткенін және жақын уақытта жаңа раунд ұйымдастырылатынын айтты.
АҚШ Ресей мен Украина арасында бейбіт келісімге қол жеткізуге делдал болуға тырысуда. Алайда Ресейдің Украинадан қазір бақылауында ұстап отырған Донбасс өңірінің шығысындағы кейбір аумақтардан әскерін әкетуді талап етуі және Киевтің бұл талапты қабылдамауы келіссөздердегі ілгерілеуді баяулатып отыр.
Кремльдің аға кеңесшілерінің бірі Мединский Женевада журналистерге берген сұхбатында: «Келіссөздер екі күнге созылды: кеше әртүрлі форматта өте ұзақ кездесу өтті, ал бүгін болса шамамен екі сағатқа жалғасты. Бұл оңай болған жоқ, бірақ ресми әрі байыпты түрде жүргізілді. Келесі кездесу жақын арада өтеді», - деді. Қысқаша мәлімдемеден кейін ол сұрақтарға жауап бермеді.
Украина: «Ілгерілеу бар»
Ал Украина тарапынан бас келіссөз жүргізуші Рустем Умеров те соғысты аяқтауға бағытталған келіссөздерде ілгерілеуге қол жеткізілгенін мәлімдеді.
Умеров: «Біз соғысты аяқтау үшін қажет негізгі мәселелер бойынша жұмыс істеуге тырыстық. Бұл екі тарап арасындағы үйлесімділікті және жеткілікті уақытты талап ететін күрделі жұмыс. Ілгерілеу бар, алайда қазір егжей-тегжейін жариялау мүмкін емес», -деді.
