ЕО көшбасшылары Ресейдің күшейіп келе жатқан шабуылдары құрлық үшін артып келе жатқан қатер екенін мәлімдеп, Украинамен қорғаныс саласында ынтымақтастықты арттыруға уәде берді.
Еуропалық кеңес төрағасы Антониу Кошта бірлескен баспасөз мәслихатында одақтың 23–24 қазанда өтетін келесі саммиті «шешім күні» болатынын айтты.
Кошта журналистерге: «Екі апта ішінде Еуропалық комиссия 2030 жылға дейінгі қорғанысқа дайындық жөніндегі жол картасын ұсынады, ал Еуропалық кеңес үш аптадан соң қайта жиналады. Сол күні шешім қабылданады», – деді.
Дания премьер-министрі Метте Фредериксен Ресейдің «бізді қорқытып, сынап жатқанын және тоқтамайтынын» айтып, Киевке қосымша қолдау көрсету қажеттігін атап өтті. Ол: «Ең алдымен Украинаға қаржылық қолдауымызды арттыруымыз керек. Енді барлығы ненің қатерге тігілгенін біледі… Басты мақсатымыз – соғыс мүлдем мүмкін болмайтындай дәрежеде мықты Еуропа құру», – деді.
Көп талқыланған мәселелердің бірі Еуропалық комиссия төрағасы Урсула фон дер Ляйеннің соғыста ұшқышсыз ұшу аппараттарының көбеюіне қарсы «дрон қабырғасы» жобасы болды.
Фон дер Ляйен әуе кеңістігі бұзылған Польша, Румыния, Эстония және Дания сияқты ЕО елдерге қолдау білдірді.
Бұл жағдайды «гибридті соғыс тактикасы» деп атаған Фредериксен әрбір азамат пен өңірдің қорғалуын атап өтіп, күшті еуропалық жауап қажеттігін жеткізді. Ол дрондардың соғысты өзгертетінін айтып, дрон технологиясы мен қарсы шараларға трансшекаралық инвестициялар салынуы тиіс екенін мәлімдеді.
