Ақ Үй жариялаған бірлескен мәлімдемеге сәйкес, АҚШ пен Украина Женевадағы келіссөздерден кейін “жаңартылған және жетілдірілген” бейбітшілік жобасын әзірледі.
Ресей–Украина соғысын тоқтатуды көздейтін Вашингтонның соңғы бейбітшілік ұсынысын талқылау үшін екі тараптың делегациялары кездескеннен кейін жексенбі күні жарияланған мәлімдемеде: “Келіссөздерде ұстанымдарды жақындастыру және келесі нақты қадамды айқындау бойынша маңызды ілгерілеушілік байқалды. Болашақтағы кез келген келісім Украина егемендігін толық қорғай отырып, орнықты әрі әділетті бейбітшілік орнатуы тиіс екені қайта расталды,” деп атап өтілді.
Делегациялар консультацияларды “өте нәтижелі” деп бағалап, жаңартылған тұжырымдаманың соңғы апталардағы ілгерілеушілікті көрсететінін айтты.
“Мызғымас қолдау”
Женевада сонымен қатар Е3 (Ұлыбритания, Франция және Германия) елдерінің ұлттық қауіпсіздік кеңесшілері украиналық делегациямен кездесті.
Мәлімдемеде Украина соғысты тоқтатуға және адам шығынын арттырмауға бағытталған күш-жігерге қатысты “Америка Құрама Штаттарының және жеке Дональд Дж. Трамптың мызғымас қолдауы үшін ризашылығын” білдірді.
Екі үкімет те “алдағы күндер” ортақ ұсыныстар бойынша жұмысын жалғастыратынын және келіссөздер алға жылжыған сайын еуропалық серіктестерімен тығыз үйлестіру жүргізетіндерін мәлімдеді. Мәлімдемеде пайда болған тұжырымдама шеңберіндегі соңғы шешімдер АҚШ және Украина президенттері тарапынан қабылданатыны атап өтілді.
28 тармақтан тұратын ұсынысқа сәйкес, Украина Ресейге қосымша аумақ беруі, армиясының көлемін шектеуі және НАТО-ға кіру талпынысынан ресми түрде бас тартуы тиіс еді. Трамп Владимир Зеленскийге жауап беру үшін бейсенбіге дейін уақыт берген болатын.
Зеленский бұл қиын шешімді “намысымызды таптау мен маңызды одақтастан айырылу қатері арасындағы таңдау” деп сипаттады.
“Жаңа ресейлік шабуыл”
Осы уақытта Харьков қаласына жасалған Ресейдің дрондық шабуылы салдарынан төрт адам қаза тауып, 17 адам жараланды.
Қала әкімі Игор Терехов “Telegram” арнасында кешкі шабуыл туралы хабарлап,
“17 адамның жараланғаны белгілі. Төрт адам қаза тапты,” деді.
Харьков облыстық әскери әкімшілігінің басшысы Олег Синегубов шабуылды “ірі ауқымды” деп сипаттады.
