Сауд Арабиясының бас мүфтиі, әрі ширек ғасырдан астам уақыт бойы елдің ең жоғары діни жетекшісі болған, жасы 80-нен асқан Шейх Абдүләзиз бин Абдулла әл-Шейх сейсенбі күні өмірден өтті.
Мекке мен Мәдина сияқты Исламның қасиетті қалалары орналасқан Сауд Арабиясы  - әр мұсылман өмірінде бір рет орындауы тиіс қажылықтың мекені. Сондықтан бас мүфти Шейх Абдүләзиздің мәлімдемелері әрқашан ерекше назарда болатын.

Соңғы жылдары әйелдерге көлік жүргізуге рұқсат беру, кинотеатрлардың ашылуы сияқты әлеуметтік тұрғыдан либерал қадам басып,  Корольдікпен тығыз байланысты болған Шейх Абдүләзиз ДАИШ пен Әл-Каида секілді экстремистік ұйымдарды айыптаған еді.

Корольдікті 89 жастағы Салманның атынан басқарып  отырған тақ мұрагері Мұхаммед бин Салман сейсенбі түні Эр-Риядта өткен жаназа намазына қатысты.

Сарай мәлімдемесінде: «Корольдік пен  ислам әлемі мұсылмандарға зор қызмет еткен көрнекті ғалымнан айрылды» делінген.

Жастайынан көру қабілетінен айрылған Шейх Абдүләзиз 1999 жылы Сауд Арабиясының Королі Фахдтың тұсында бас мүфти болып тағайындалған еді.