“Dhaka Tribune” газетінің хабарлауынша, Бангладеш Денсаулық сақтау министрлігіне қарасты Денсаулық сақтау қызметтері бас басқармасы елдегі қызылша індетіне қатысты соңғы мәліметті жариялады.
15 наурыздан бері елде қызылшаға ұқсас белгілері байқалған 1097 бала және қызылша диагнозы расталған 104 бала қайтыс болған.
Осы кезеңде қызылша жұқтырды деген күдікпен 190 663 адам ауруханаға жатқызылған. Олардың 183 042-сі сауығып, ауруханадан шығарылған.
Сондай-ақ қызылшаға ұқсас белгілері бар адамдардың саны 214 551-ге, ал қызылша жұқтырғаны расталған науқастар саны 23 157-ге жеткені атап өтілді.
Елде наурыз айында басталған шұғыл вакцинация науқаны аясында алдымен 6 айдан 5 жасқа дейінгі балаларға басымдық берілді. Кейін вакцинация науқаны кезең-кезеңімен бүкіл ел аумағына кеңейтілді.
Пневмония мен энцефалопатия сияқты ауыр асқынуларға әкелуі мүмкін қызылша әлемде вакцина арқылы алдын алуға болатын өлім-жітімнің негізгі себептерінің бірі саналады.
