Пәкістан премьер-министрі Шахбаз Шариф АҚШ пен Иранның, сондай-ақ екі елдің одақтастарымен бірге Ливанды қосқандағы барлық қақтығыс аймағында дереу атысты тоқтату туралы келісімге келгенін жариялады.

Шариф сәрсенбі күні таңертең ерте “Х” желісінде жасаған мәлімдемесінде «Зор қуанышпен Иран Ислам Республикасы мен Америка Құрама Штаттарының өз одақтастарымен бірге Ливан және басқа да аймақтарды қосқанда, барлық жерде дереу күшіне енетін атысты тоқтату туралы келіскенін жариялаймын», — деді.

Шариф «Екі тарап та ерекше даналық пен түсіністік танытып, бейбітшілік пен тұрақтылық ісін алға жылжыту үшін сындарлы жұмыс істеуді жалғастырды», — деп атап өтті.

Пәкістан премьер-министрі сондай-ақ барлық мәселені шешу үшін нақты келісімге келу мақсатында АҚШ пен Иран делегацияларын жұма күні келіссөз жүргізу үшін Исламабадқа шақырғанын айтты. Шариф «Исламабад келіссөздері тұрақты бейбітшілікке қол жеткізуде сәтті болады деп шын жүректен үміттенемін және алдағы күндері бұдан да жақсы жаңалық жариялауды тілеймін!» — деп қосты.

Екі апталық бітім

Бұл мәлімдемелер АҚШ президенті Дональд Трамптың «Иранға бағытталған бомбалау мен басқа да шабуылдарды екі апталық мерзімге тоқтата тұруға келіскенін» айтқаннан кейін жасалды. Иран да егер елге жасалған шабуылдар тоқтаса, «қорғаныс операцияларын» тоқтататынын мәлімдеді.

Осы арада Иран Сыртқы істер министрі Аббас Аракчидің айтуынша, Ормуз бұғазы арқылы қауіпсіз өтуді Иран қарулы күштері қамтамасыз етеді.