Түркия Қаржы министрі Мехмет Шимшек халықаралық протекционизм мен экономикалық бөлшектенудің күшеюіне қарсы тұру мақсатында Түркияның Даму жолы мен Орта дәліз секілді жаһандық сауда бағыттарына салып жатқан инвестицияларын атап өтті.
Министр сәрсенбі күні “Kanal 7” арнасы ұйымдастырған “Yükselen Türkiye Zirveleri” саммитінде Түркияның өңірлік экономикалық ықпалдастыққа инвестиция салу арқылы жаһандық бөлшектенуге қарсы ел мүддесіне сай дәліздерді нығайтып жатқанын айтты.
Әлемнің бұрын-соңды болмаған деңгейде белгісіздік жағдайында тұрғанын, қақтығыс пен шиеленістің күшейгенін еске салған министр АҚШ/Израиль–Иран соғысының бірқатар уақытша макроэкономикалық мәселе туғызғанын жеткізді. Оның айтуынша,экономикалық өсім қарқынының баяулауы мүмкін.
Шимшек Басрадан Түркияға дейін созылатын шамамен 1200–1250 шақырымдық теміржол желісін, автожолды және энергетикалық дәлізді қамтитын Даму жолы маңызды байланыс бастамаларының бірі екенін айтты.
Азияны Еуропамен байланыстыру
Министр бұл жобаға БАӘ, Катар және Ирак серіктес болып отырғанын айтып, Орта дәліздің Азияны Еуропамен жалғайтын негізгі бағыттардың бірі екенін білдірді.
Шимшек: «Стамбулдағы үшінші көпір сол көпір арқылы өтетін теміржол байланысы үшін арнайы кең етіп салынды. Бұл — Орта дәліздің ең маңызды құрамдас бөлігі, 8,1 миллиард долларлық жоба», - деді.
Сонымен қатар министр жобаны 83 пайызын халықаралық қаржы ұйымдары қаржыландыратынын хабарлап, Түркияның Орта дәлізді күшейту мақсатында Дүниежүзілік банкпен келісімге қол қойғанын да еске салды.
