Дәстүрлі компьютерлерде жады мен процессор арасында деректердің үздіксіз тасымалдануы есептеу үдерісін баяулатып, энергияны көп тұтынуға әкеледі.
Жаңа әзірленген чип маңызды есептеулерді деректер сақталатын орында тікелей орындайды. Соның нәтижесінде жады мен процессор арасындағы деректерді тасымалдау қажеттілігі жойылып, миды модельдеу үдерісі әлдеқайда жылдам әрі энергияны аз жұмсай отырып жүзеге асырылады.
Медициналық технологиялардағы жаңа кезең
Сынақтар барысында чип мидың ақ және сұр заттарының шекарасын жоғары дәлдікпен модельдеп, мидың күрделі қатпарлы құрылымын сақтай отырып, топографиялық тұрғыдан үйлесімді әрі тегіс үш өлшемді беткі торлар жасады.
Жасанды интеллектке негізделген күрделі модельдеу уақытын миллисекунд деңгейіне дейін қысқартатын бұл технологияны ми–компьютер интерфейстерінде, мидың цифрлық егіздерін жасауда, операция кезінде нақты уақыт режимінде қолданылатын навигациялық жүйелерде, сондай-ақ Альцгеймер және Паркинсон сияқты нейродегенеративті ауруларды зерттеуде пайдалану жоспарланып отыр.
Қытай ғылым академиясының Шанхай микрожүйелер және ақпараттық технологиялар институтының қатысуымен әзірленген чипке қатысты зерттеу “Science” ғылыми журналында жарияланды.
