АҚШ президенті Дональд Трамп Иран соғысына байланысты бұрын жоспарланған саммит кейінге қалғаннан кейін мамыр айында Бейжіңде қытайлық әріптесі Си Цзиньпинмен кездесетінін айтты.

Трамп сәрсенбі күні жасаған мәлімдемесінде негізінен наурыз айының соңында жоспарланған «тарихи маңызы бар» сапарды асыға күтетінін және Си мен оның жұбайын жылдың соңында Вашингтонда қонақ қылатынын жеткізді.

Трамп «Truth Social» желісіндегі мәлімдемесінде «Ирандағы әскери операциямызға байланысты кейінге қалдырылған Қытайдың мемлекет басшысы Си Цзиньпинмен кездесуім қайта жоспарланды және 14-15 мамырда Бейжіңде өтеді», — деді.

Трамп АҚШ пен Қытай шенеуніктерінің «тарихи» Бейжің және Вашингтон сапарлары үшін «дайындықты аяқтағанын» айтып, «Төраға Симен бірге өткізетін уақытымды асыға күтемін, бұл өте маңызды оқиға болатынына сенімдімін», — деп толықтырды.

Ақ Үй Трамптың әлеуметтік желідегі жазбасынан сәл бұрын жаңа мерзімдерді жариялаған болатын. Трамп әлемдегі ең ірі екі экономика арасындағы сауда байланыстарын қайта реттеуді көздейтін саммит үшін екінші президенттік мерзімінде алғаш рет 31 наурыз бен сәуір айлары аралығында Бейжіңге баруды жоспарлаған еді.

Алайда Трамптың назары Иранмен жалғасып жатқан соғысқа ауып, 16 наурызда Қытайдан кездесуді кейінге қалдыруды сұрағанын айтты. Трамп сол кезде журналистерге: «Соғысқа байланысты осында болғым келеді, осында болуым керек деп есептеймін. Сондықтан бір айға жуық уақытқа шегеруді өтіндік», — деген болатын.

Трамп Қытайға соңғы рет 2017 жылы барған еді. Бұл АҚШ президентінің Қытайға жасаған соңғы сапары болатын. Трамптың бұл жоспарланған сапары көшбасшылардың қазан айында Оңтүстік Кореяда сауда бітімі туралы келіскен кездесуінен бергі алғашқы бетпе-бет жүздесуі болмақ.