Грекия премьер-министрі Кириакос Мицотакис елінің Түркиямен қарым-қатынасы туралы: «Географиямызды өзгерте алмаймыз, көршілес болу — біздің тағдырымыз», — деді.
Кириакос Мицотакис Біріккен Ұлттар Ұйымы (БҰҰ) Бас Ассамблеясының 81-сессиясында сөйлеген сөзінде Түркия мен Грекия арасындағы қарым-қатынасқа да тоқталды.
«Соңғы үш жылда қарым-қатынасымызды жақсарту, өзара сенімді нығайту және дағдарыстарға алып келуі мүмкін шиеленістердің алдын алу үшін диалог орнатуға күш салып келеміз», — деді ол.
Мицотакис Түркия мен Грекия арасында тарихи мәселелердің салмағы сезілетін нәзік қарым-қатынас бар екенін айтып, өңірлік және ауқымды халықаралық өзгерістерді ескере отырып, бұдан әрі қалай әрекет ету керектігі жөнінде шүғыл ортақ келісімге келу қажет екенін айтты.
Оның айтуынша, бұл келісім халықаралық құқық пен тату көршілік қатынастарын құрметтеуге негізделуі тиіс.
«Бұған дейін де бірнеше рет атап өткенімдей, географиямызды өзгерте алмаймыз, көршілес болу — біздің тағдырымыз», — деді Мицотакис.
Грекия премьер-министрі Түркия мен Грекия арасындағы жалғыз келіспеушілік Айрықша экономикалық аймақтың (АЭА) және құрлықтық қайраңның шекараларын белгілеуге қатысты екенін мәлімдеді. Сондай-ақ ол БҰҰ-ның Теңіз құқығы жөніндегі конвенциясы бұл мәселелерді шешудің жалғыз институционалдық негізі екенін алға тартты.
Кириакос Мицотакис Кипр мәселесіне де тоқталып, оны БҰҰ шешімдерінің орындалу деңгейін айқындайтын мәселе деп бағалады.
Грекия премьер-министрі БҰҰ Бас хатшысы Антониу Гутерриштің осы мәселе бойынша келіссөздерді қайта бастауға бағытталған күш-жігерін қолдайтындарын да мәлімдеді.
