Папа Францисктың жерлеу рәсімінен кейін дүйсенбі күні кардиналдар алқасы алғаш рет жиналды. Құпия түрде өткізілетін, Папаны сайлау рәсімі ретінде белгілі конклавтың басталу ықтимал күнін талқылаған алқа мүшелері жаңа Папаны сайлауға дайындықты бастады.
Шешім түскі уақытта (GMT уақытымен 10:00-де) жариялануы мүмкін екені хабарланды.
Конклавтың 6 мамырдан бұрын басталмайтыны болжанып отыр.
Папалар сайлауы өтетін 16-шы ғасырдан қалған әйгілі Сикст капелласы дүйсенбі күні туристерге жабылып, дауыс беруге дайындықтар басталды.
Соңғы екі конклав 2005 және 2013 жылдары өткізілген және бар болғаны екі күнге созылған болатын.
Алайда швед кардиналы Андерс Арборелиус дүйсенбі күнгі мәлімдемесінде бұл жолғы конклавтың ұзағырақ болуы мүмкін екенін айтты. Оның себебі ретінде Папа Францисктың тағайындаған көптеген кардиналының бір-бірімен бұрыннан таныс болмауын алға тартты.
Франциск Мьянма, Гаити және Руанда сияқты бұрын кардиналдары болмаған аймақтардан жаңа кардиналдар тағайындауға басымдық берген болатын.
«Біз бір-бірімізді танымаймыз», – деді конклавқа қатысатын 80 жасқа толмаған шамамен 135 кардиналдың бірі- Арборелиус.
2013 жылдан бері Папа болған Франциск 21 сәуір күні 88 жасында қайтыс болды.
Оның сенбі күні өткен жерлеу рәсіміне және Римдегі Санта Мария Маджоре базиликасындағы қабіріне жасалған құрмет шеруіне 400 мыңнан астам адам қатысты.
Неміс кардиналы Вальтер Каспер “La Repubblica” газетіне берген сұхбатында
"Франциск үшін қайғырып жиналған халық католиктердің келесі Папаның реформалық бағытты жалғастырғанын қалайтынын көрсетті," – деді.
Латын Америкасынан шыққан алғашқы Папа Франциск әдетте консервативті болып саналатын Рим- католик шіркеуінің жаңаша тақырыптарды талқылауына жол ашты, мысалы әйелдердің діни қызметке тағайындалу мүмкіндігі сияқты мәселелерді көтерді.
"Құдайдың халқы өз таңдауын іс-әрекетімен білдірді." – деді конклавқа қатыспайтын 92 жастағы Каспер.
"Біз Францисктың жолымен жүруіміз керек деп санаймын," – деді ол.
Алайда консервативті кардиналдар бұған қарсы шығып, дәстүрлерді қайтадан күшейтетін әрі Францисктың ашық әрі инклюзивті шіркеу көзқарасын шектеуге тырысатын Папаны сайлауға ұмтылады.
