Израиль парламенті (Кнессет) оппозициялық партиялар ұсынған парламентті тарату туралы заң жобасына дауыс беруге дайындалып жатыр.

Оппозициялық партиялар сәрсенбі күні жасаған мәлімдемесінде «Кнессетті тарату туралы заң жобасын ұсыну шешімі бірауыздан қабылданды және барлық топтар үшін міндетті», - деді.

Сондай-ақ мәлімдемеде «Барлық топты үйлестіру арқылы оппозициялық заңдарды күн тәртібінен алып тастау және барлық күш-жігерді бір мақсатқа яғни үкіметті құлатуға бағыттау туралы шешім қабылданды», - делінген.

Заң жобасын қолдаушылар Кнессетті таратып, мерзімінен бұрын сайлау өткізу үшін ультра православиелік партиялардың қолдауына ие болуға тырысуда.

Оппозиция 120 орындық Кнессетте жеті орынға ие Біріккен Тора иудаизм блогының қолдауына ие.

Алайда Кнессеттегі 11 орынға ие Шас партиясының заң жобасын қолдап, қолдамайтындығы әзірге белгісіз.

Израильдің «Chanel13» телеарнасы «Премьер-министр Беньямин Нетаньяху Хареди еврейлерін міндетті әскери қызметтен босататын заңды қабылдамағаны үшін Шас партиясы Кнессетті таратуға дауыс береді» деп болжады.

Қазіргі уақытта үкімет коалициясы парламентте 68 орынға ие және билікте қалу үшін кемінде 61 орын қажет.

Ультра православиелік қауым 2024 жылдың 25 маусымында Жоғарғы соттың міндетті әскери қызмет жүктеген және бұл шешімді сынайтын діни мекемелерге қаржылық қолдау көрсетуге тыйым салған үкімінен кейін міндетті әскери қызметке қарсы наразылықтарын жалғастыруда.

Харедилер 10 миллиондық Израиль халқының шамамен 13 пайызын құрайды. Діни негізде әскери қызметке қарсы шыққан олар Таурат бойынша еңбек олардың басты міндеті екенін және зайырлы қоғамға бейімделу олардың діни болмысы мен әлеуметтік тұтастығына қауіп төндіретінін алға тартуда.