Украина астанасының мэрі Киевтің барлық ауданының кең ауқымды шабуылға ұшырағанын айтты. «AFP» ақпарат агенттігі Ресейдің инфрақұрылым нысандарына соққыларын күшейтіп, қаланың орталығында жарылыстар тіркелгенін хабарлады.

Киев әкімі Виталий Кличко бұл жағдайды «ауқымды шабуыл» деп сипаттап, әуе қорғаныс күштерінің жұмыс істеп тұрғанын мәлімдеді.

Кличко «Telegram»-да: «Кемінде 11 адам жараланды. Олардың бесеуі ауруханаға жеткізілді. Араларында жүкті әйел мен жағдайы өте ауыр ер адам бар», -  деп жазды.

Ол сондай-ақ жылу жүйелерінің кейбір бөліктерінің зақымданғанын және қаланың солтүстік-шығысындағы Деснянский ауданында кейбір үйлердің уақытша жылусыз қалғанын атап өтті.

Сонымен бірге жарық пен су беруде де үзілістер болуы мүмкін екенін ескертті.

Киев облыстық әскери басқармасының басшысы Николай Калашник жұма күні Киевте зымырандар мен дрондардың маңызды инфрақұрылымдарды нысанаға алғанын хабарлады.

«AFP» тілшілері дрондарға қарсы қолданылған оқтарды және бірнеше әуе шабуылына қарсы қорғаныс жүйесінің іске қосылғанын көрген.

Қаланың әскери басқармасының басшысы Тимур Ткаченко әлеуметтік желіде: «Орыстар тұрғын үйлерді нысанаға алуда. Киевтің барлық ауданында биік ғимараттар қатты зақымданған», - деп жазды.

Кличко Киевтің 10 ауданынан сегізінде өрт немесе қираған ғимарат тіркелгенін, барлық жерге жедел медициналық көмек топтарының жіберілгенін айтты.

Қаланың халықаралық әуежайына жақын орналасқан Соломенский ауданындағы бес қабатты тұрғын үйдің шатырында өрт шыққан.

Украина көпқабатты үйлер мен мұнай базасына соққы берді

Ресми деректерге қарағанда, Украинаның бір дрон шабуылы Ресейдің Қаратеңіздегі Новороссийск портында үш тұрғын үйге, бір мұнай қоймасына және жағалау инфрақұрылымына зиян келтірді.

Краснодар өлкесінің жедел штабы дрон сынықтары үш пәтерге тиіп, терезелерді сындырғанын, бірақ ешкім жарақат алмағанын хабарлады.

Сонымен қатар шабуыл бір тасымалдау кешеніндегі мұнай қоймасына және жағалау нысандарына зақым келтіргенін, бірақ қосымша мәлімет берілмегенін атап өтті.

Бұл шабуыл Киевтің батыс одақтастары Ресейге қысымды күшейтіп жатқан кезеңге тұспа-тұс келді.

Сәрсенбі күні Канада Ресейдің дрон өндірісін, энергия өндіруін және кибершабуылдарға пайдаланылатын инфрақұрылымын нысанаға алған жаңа санкцияларды енгізгенін жариялады.

Сол күні «G7»-ге мүше елдердің Сыртқы істер министрлері Украинада дереу бітім орнатуға шақырып, елдің аумақтық тұтастығына қолдау көрсететіндерін айтты.

Еуропалық комиссия Украина соғысынан кейін тоқтатылған ресейлік активтердің бір бөлігін Киевке алдағы екі жылда бюджеттік және әскери қолдау көрсету мақсатында несие беру үшін пайдалануды қарастыруда.

Еуропалық комиссия Украинаға алдағы екі жылда бюджет және әскери қолдау мақсатында несие беру үшін Ресейдің соғыс басталғаннан кейін тоқтатылған активтерінің бір бөлігін пайдалануды қарастырып жатыр.

Мәскеу бітім жөніндегі ұсыныстарды қабылдамай отыр және АҚШ президенті Дональд Трамптың ұзақ уақыт бойы тоқырап тұрған бейбіт келісімді қайта жандандыру талпыныстарына қарсы шықты.

Ресей дүйсенбі күні майдан желісі бойындағы тағы үш ауылды басып алғанын және мұнда адам күші мен жабдықтың артықшылығын пайдаланғанын мәлімдеді.