Иранның Азаматтық авиация ұйымының төрағасы Абузер Шируди елінің авиация саласына қатысты шектеулерге байланысты Халықаралық азаматтық авиация ұйымына (ICAO) шағым түсіргенін мәлімдеді.
Иранның “IRNA” ресми ақпарат агенттігінің хабарлауынша, Шируди Иранға енгізілген ұшу шектеулері туралы айтты.
Иранның кедергілерді жою және бұрын жұмыс істеген бағыттар бойынша рейстерді қайта бастау мақсатында құқықтық және дипломатиялық жолдарды қолданып жатқанын айтқан Шируди АҚШ-тың Иран авиация саласына қатысты шектеулеріне байланысты ICAO-ға шағым түсіріп, мәселеге қатысты құжаттарды ұсынғандарын атап өтті.
Шируди Еуропа елдеріне тікелей рейстерге қойылған шектеулерге байланысты Стамбул бастаған аймақтық авиациялық хабтар арқылы транзиттік рейстер жүзеге асырылып жатқанын және бұл тәсілдің балама шешім ретінде қолданыла беретінін жеткізді.
АҚШ-тың Иран авиация саласына қарсы жаңа санкцияларының салдарынан Ирак, Әзербайжан, Грузия, Оман және Біріккен Араб Әмірліктері (БАӘ) Ираннан келетін және Иранға ұшатын рейстерді тоқтатқан еді.
Ирак пен Иран арасында рейстерді Тегеран–Бағдат бағытының орнына Тегеран–Наджаф бағыты бойынша орындау жөнінде келіссөздер жүргізілген, алайда кейін Тегеран–Наджаф рейстері де тоқтатылған еді.
