АҚШ Мемлекеттік департаментінің мәліметінше, соғыс басталғалы бері Таяу Шығыста жүрген америкалықтарды эвакуациялау жұмыстары белсенді жүргізілуде. Консулдық істер жөніндегі мемлекеттік хатшының орынбасары Дилан Джонсонның айтуынша, ведомство жиырмадан астам чартерлік ұшақ ұйымдастырып, мыңдаған азаматты қауіпсіз түрде елге қайтарған.
Қазіргі уақытта өңірде тұрақты әуе рейстері біртіндеп қалпына келе бастағанымен, АҚШ билігі чартерлік ұшақтар мен құрлық арқылы эвакуациялау мүмкіндігін сақтап отыр. Джонсонның сөзінше, чартерлік рейстердегі бос орындар эвакуацияға мұқтаж америкалықтардың санынан да көп.
АҚШ Мемлекеттік департаменті Оман, Кувейт, Бахрейн, Біріккен Араб Әмірліктері, Катар, Сауд Арабиясы және Израильде жүрген азаматтарын елден шығуға көмек алу үшін арнайы дағдарыс тіркеу формасын толтыруға шақырды.
Айта кетейік, 28 ақпанда басталған соғыста қазірдің өзінде 1300-ден астам адам қаза тапқан. Қаза тапқандар арасында Иранның рухани көшбасшысы Әли Хаменеи, 150-ден астам қыз бала және жоғары әскери шенеуніктер бар екені хабарланды.
Иран жауап ретінде аймақтағы АҚШ әскери базаларына, дипломатиялық нысандарына және әскери қызметкерлеріне, сондай-ақ Израильге қарсы әуе шабуылдарын ұйымдастырды. Бұл шабуылдар нәтижесінде кемінде жеті америкалық әскери қызметкер қаза тапты.
