Глазго университетінің зерттеушілері 90 мыңнан астам адамды 10 жылдан аса уақыт бойы бақылаған. «PLOS Medicine» журналында жарияланған нәтижелерге сәйкес, ояу кезде бір орында 30 минуттан артық отыру немесе жату қатерлі ісіктен қайтыс болу қаупін арттырады. Қимылсыз өткізілген әрбір сағат бұл қауіпті одан әрі күшейтеді.
Алайда зерттеу мұндай қимылсыз кезеңдерді физикалық белсенділікпен бөліп отырудың үлкен әсері болуы мүмкін екенін көрсетті. Әр жарты сағат сайын орнынан тұрып, қозғалу денсаулыққа айтарлықтай оң әсер етеді.
Жеңіл қозғалыстың пайдасы
Зерттеудің жетекшісі доктор Фредерик Хо қолданыстағы денсаулық сақтау нұсқаулықтарының көбіне орташа немесе ауыр жаттығуларға басымдық беретінін, алайда зерттеу нәтижелері жеңіл қимыл-қозғалыстың да назардан тыс қалмауы керектігін көрсеткенін айтты.
Ұлыбританиядағы «UK Biobank» жобасына қатысқан 91 мыңнан астам адамға тағылған технологиялық құрылғылардан алынған деректерді зерттеген мамандар қатысушыларды орта есеппен 12 жыл бойы бақылаған. Нәтижелер күн сайын қимылсыз өткізілген әрбір қосымша сағаттың қатерлі ісіктен қайтыс болу қаупін 10 пайыз арттырғанын көрсетті.
Ал қимылсыз өткен уақытты қозғалыспен алмастыру бұл қауіпті төмендетеді. Зерттеуге сәйкес, күн сайын бір сағаттық қимылсыздықтың орнына үтіктеу немесе ыдыс жуу сияқты жеңіл физикалық белсенділік жасау қатерлі ісіктен қайтыс болу қаупін 12 пайыз азайтады.
Күнделікті 30 минуттық қимылсыздықты орташа қарқындағы жүріспен алмастыру бұл қауіпті 8 пайыз төмендетеді.
Ал бес минуттық қимылсыздықтың орнына бес минут ауыр физикалық белсенділік қосу қауіпті 22 пайыз азайтады.
Зерттеу бақылауға негізделген статистикалық талдауларды қамтығандықтан, нақты себеп-салдар байланысын дәлелдей алмайды. Алайда мамандар қимылсыз отырудың алдын алуға бағытталған жеке стратегияларды әзірлеудің клиникалық тұрғыдан маңызды екенін атап өтті.
