БҰҰ Бас Ассамблеясы Украинадағы соғысты тоқтату туралы қарар қабылдады

 БҰҰ Бас Ассамблеясы сейсенбі күні Украинада жан-жақты, әділ және тұрақты бейбітшілікке шақыратын қарарды қабылдады. Дауыс беру барысында АҚШ қалыс қалып, Ресей қарсы екендігін білдірді.

Украинадағы соғысты тоқтатуға арналған қарар 107 қолдау тауып, 12 қарсы және 51 қалыс дауыспен қабылданды.

Украина ұсынған және 46 ел қолдаған қарарда соғыстың өңірге және жаһанға кері әсері басым екендігі аталды. Сондай-ақ Ресейдің «бейбіт тұрғындарға, азаматтық нысандарға және аса маңызды энергетикалық инфрақұрылымға» бағытталған шабуылдарына, гуманитарлық жағдайдың нашарлауына қатты алаңдаушылық білдірілді.

Бас Ассамблея Қарарда Украинаның егемендігіне, тәуелсіздігіне, бірлігіне және аумақтық тұтастығына бағытталған берік ұстанымды қайта растады.

Сондай-ақ «шұғыл, толық және шартсыз бітімге» шақырған қарар сенімді арттырудың негізгі шаралары ретінде соғыс тұтқындарын, заңсыз ұсталған барлық адамдарды босатуды және балаларды қоса алғанда, мәжбүрлі түрде қоныс аударған немесе депортацияланған бейбіт тұрғындардың қайтарылуын талап етті.

Осы тұста АҚШ қарардың бір бөлігін негізгі мәтіннен бөліп, оған бөлек дауыс беру туралы ұсыныс тастады.

Украинаның Сыртқы істер министрі орынбасары Марьяна Беца бұл ұсынысқа қарсы шығып, оның алаңдатарлық және қабылдауға болмайтынын атады.

Ал АҚШ-тың БҰҰ-дағы өкілі Тэмми Брюс қарардағы кейбір тұжырымдар тұрақты бейбітшілікке апаратын барлық дипломатиялық жолды талқылауды қолдаудың орнына назарды басқа жаққа бұруы мүмкін екендігін атап өтті.