Еуропа Кеңесінің төрағасы Антониу Кошта мен Еуропа Комиссиясының төрайымы Урсула фон дер Ляйен Нью-Йорктегі БҰҰ Бас Ассамблеясы аясында Сирия президенті Ахмед Шарамен кездесті.

“Х” әлеуметтік желісінде жарияланған бірлескен мәлімдемеде ЕО жетекшілері Шарамен Сирияның өтпелі кезеңінде кездесіп отырған қиындықтар жөнінде «мазмұнды әңгіме өткізгендерін» айтты.

Мәлімдемеде одақтың «зиянды сыртқы араласулардан ада, шынайы, инклюзивті, бейбіт және Сирияның өзі басқаратын өтпелі үдерісті» қолдайтыны қайта расталды.

Мәлімдемеде «Саяси диалогты тереңдетуге, жедел гуманитарлық қажеттіліктерді қанағаттандыруға және Сирияның әлеуметтік-экономикалық қалпына келуіне әрі қайта құрылуына қолдау көрсетуге біз табандымыз», – делінген.

Шамамен 25 жыл бойы Сирия режимін басқарған Башар Асад былтыр желтоқсан айында Ресейге қашып кеткеннен кейін, 1963 жылдан бері билікте болған Баас партиясының режимі аяқталған болатын. Ахмед Шараның жетекшілігімен қаңтар айында жаңа өтпелі үкімет құрылды.

Асад қызметінен кеткеннен бері Сирияның жаңа билігі саяси және экономикалық реформаларды жүзеге асыруға, қоғамдық келісімді нығайтуға және аймақтық әрі халықаралық серіктестермен ынтымақтастықты кеңейтуге басымдық беріп келеді.