Еуропалық комиссия төрайымы Урсула фон дер Ляйен НАТО Бас хатшысы Марк Руттемен бірлескен баспасөз мәслихатында қолданылуы тоқтатылған ресейлік активтер тәркіленбегенін және Мәскеу өтемақы төлеген жағдайда Украинаның несиені қайтара алатынын тағы да атап өтті.

ЕО Комиссарлар алқасымен қорғаныс және қауіпсіздік мәселелерін талқылаудың алдында өткен баспасөз мәслихатында фон дер Ляйен: «Активтер тәркіленбеді. Егер Ресей өтемақы төлесе, Украина несиені қайтаруға міндетті», -деді.

Фон дер Ляйен Украинаны әскери қолдау үшін «құрылымдық шешім» ретінде Ресейдің қолданылуы тоқтатылған активтеріне негізделген өтемақы несиесі идеясын ұсынғанын атап өтіп, « Несие бірден емес, кезең-кезеңімен бөлініп, белгілі бір шарттарға байланысты беріледі», - деп қосты.

Ол сондай-ақ «Украина біздің алғашқы қорғаныс шебіміз» деп есептесек, онда оған әскери көмекті күшейту қажет екенін баса айтты.

«Қазір Еуропалық комиссияның SAFE (Еуропалық қауіпсіздік әрекеті) және басқа да бастамалар арқылы Украинаны мүмкін болғанынша ұтымды жағдайға жеткізу үшін жасап жатқан барлық жұмысы өте маңызды. Бұл соғыста да, ықтимал бейбіт келіссөздерде де Украинаның ең мықты позицияда болуына шешуші рол атқарады», - деді Рутте.

Дания астанасы Копенгаген әуежайларында, сондай-ақ Польша мен Эстониядағы оқиғалардан кейін байқалған ұшқышсыз ұшақтарға тоқталған Рутте әуе кеңістігін қауіпсіз ұстаудың маңызын тағы да атап өтіп, «Біз өз әуе кеңістігімізді қорғауымыз керек. Сондықтан дрон қабырғасы бастамасы дер кезінде жасалған қажет қадам», - деді.

Ресейдің соңғы әуе кеңістігін бұзу әрекеттерінен кейін ЕО елдері ұшқышсыз ұшақтарға қарсы қорғаныс жүйесін құру туралы алғашқы талқылауларын өткізді. Еуропалық қорғаныс комиссары Андриус Кубилиус: «Шығыс қапталын бақылау, ортасында «дрон қабырғасымен» бүкіл Еуропаға қызмет ететін болады», - деді.

Польша, Румыния, Латвия, Эстония, Норвегия және Данияны қоса алғанда көптеген ЕО елі әуе кеңістігінің бұзылуы және ұшқышсыз ұшақтардан туындаған қиындықтарды хабарлады, кейбір дрондардың Ресейге тиесілі екені расталды.