Израильдің Қорғаныс министрі Исраэль Кац Израильдің Газадан ешқашан шықпайтынын айтып, аймақтың айналасында кең қауіпсіздік белдеуін қалыптастыру және солтүстігінде қоныстануға рұқсат беруді тағы да қайталады.
«Haaretz» газетінің хабарлауынша, конференцияда сөз алған Кац Израильдің Газада тұрақты түрде қалатынын және қауіпсіздік үшін буферлік аймақ құратынын мәлімдеді.
Кац осы апта басында Газаның солтүстігінде жаңа тұрғын үй салу жөнінде мәлімдемелер жасаған болатын. Израильдік БАҚ бұл мәлімдемелер АҚШ президенті Дональд Трамп әкімшілігінің наразылығын туғызғанын жазды.
Министрдің айтуынша, уақыты келгенде Газаның солтүстігінде Нахаль әскери бекеттерін ұйымдасқан түрде құру мүмкін болады.
Нахаль бекеттері ˗ Израиль армиясының бақылауындағы, әскери борышты қоныстандырумен ұштастыратын, жастарға арналған қоныстану үлгісі ретінде белгілі.
Кац бұрынғы мәлімдемелерінен бас тартты деген ақпаратты жоққа шығарып, Израильдің Газада егемендік орнататынын айтты және мұны басып алынған Батыс Шериядағы Израиль саясатына ұқсатты.
Басып алынған Батыс Шериядағы бақылау
Палестиналық ресми деректерге сәйкес, геноцид басталғалы бері Израиль басып алынған Батыс Шерияда бақылауды күшейтуге бағытталған әрекеттерін арттырды. Олардың қатарында үйлерді бұзу, мәжбүрлі түрде көшіру және заңсыз қоныстануды кеңейту бар.
БҰҰ қарарларында айтылғандай, Батыс Шерияны басып алу екі мемлекет шешімі мүмкіндігін іс жүзінде жоққа шығарады.
Шығыс Иерусалимді қоса алғанда, оккупацияланған Батыс Шерияда шамамен 750 мыңға жуық израильдік заңсыз қоныстанушы тұрады.
Израильдік БАҚ Кацтың мәлімдемелері Нетаньяхудың 29 желтоқсанда Трамппен жоспарланған кездесуін қиындатуы мүмкін екенін ескертті.
