Әскери дереккөздердің мәліметінше, Израиль армиясы Газаның оңтүстігінде орналасқан Рафах қаласында екі палестиналықты өлтіріп, қазан айынан бері күшінде тұрған бітім келісімін тағы бір рет бұзған.
Израиль әскері Рафахтың батыс бөлігіне танктер жібергенін, ол жерде оқ атқанын және әуе шабуылдарын ұйымдастырғанын хабарлады.
Иврит тілінде шығатын “Israel Hayom” газеті қақтығыстар кезінде екі израильдік сарбаздың жеңіл жарақат алғанын мәлімдеді.
Палестиналық тойтарыс қозғалысы ХАМАС Израильдің шабуылдарын бітім келісімінің «айқын бұзылуы» деп қатаң айыптады.
Сонымен қатар ХАМАС делдалдар мен кепілгер елдерді «Израильдің қайталанып отырған бұзушылықтарын» айыптауға шақырып, Беньямин Нетаньяхуды шабуылдарды «жалған әрі қолдан жасалған сылтаулармен» басқарды деп айыптады.
ХАМАС бұзушылықтарды тоқтату үшін Израильге қысым жасауды, бітім шарттарының сақталуын, Рафах шекара өткелінің екі бағытта қайта ашылуын, гуманитарлық көмек пен баспанаға арналған материалдардың кіргізілуіне рұқсат беруді және келісімнің екінші кезеңіне дереу өтуді талап етті.
Бітім жөніндегі келіссөздер
ХАМАС делегациясы бітімнің келесі кезеңіне қатысты келіссөз жүргізу үшін Каирге барды.
ХАМАС таратқан мәлімдемеде делегацияны Газадағы қозғалыс жетекшісі Халил әл-Хайя басқарып отырғаны айтылды.
Мәлімдемеде келіссөздердің бітімнің толық орындалуына бағытталатыны, бірінші кезеңде аяқталмай қалған қадамдар мен Газаның Мысырмен шекарасындағы Рафах өткелін екі бағытта қайта ашу мәселелері талқыланатыны көрсетілді.
Сондай-ақ ХАМАС келісімнің екінші кезеңіне өтуді жеделдету, оның ішінде әкімшілік комитет құру және Израиль әскерінің Газадан толықтай шығуын қамтамасыз ету мәселелері де қаралатынын хабарлады.
Израиль 2023 жылғы қазан айынан бері Газада жүргізіп жатқан соғысында 71 мыңнан астам палестиналықты өлтірді. Қоршаудағы аймақтың басым бөлігін қиратқан Израиль халықты да өз мекендерінен күштеп көшуге мәжбүр етті.
