АҚШ-тың көптеген қаласы президент Дональд Трамптың заңсыз мигранттарға жасаған ауқымды рейдтеріне қарсы наразылық шерулерін өткізуде. АҚШ-тың екінші үлкен қаласы Лос-Анджелестің кейбір бөлігінде бес күнге жалғасқан наразылықты басу үшін түнгі коменданттық сағат енгізілді.
Лос-Анджелес полициясы түнгі коменданттық сағатқа қарамастан қала орталығына жиналған адамдарды жаппай қамауға алуды бастағанын айтты.
Лос-Анджелес полиция департаменті сейсенбі күні түнде «X» платформасында жариялаған мәлімдемесінде «Бірнеше топ қала орталығындағы коменданттық сағат аймағына кіретін «Spring» мен «Alameda» арасындағы 1-ші даңғылда жиналуда. Бұл топтарға тиісті шаралар қолданылып, жаппай тұтқындалуда. Коменданттық сағат күшінде қалады», - деді.
Федералды мигранттардың мекенжайларына жасалған рейдтердің күшеюінен туындаған бірнеше күндік наразылықтардан кейін кешкі 20:00-ден таңғы 6:00-ге дейін коменданттық сағат енгізілген болатын.
Мэр Карен Басс төтенше жағдай мен коменданттық сағат вандализм, тонау және зорлық-зомбылық алаңдаушылығына байланысты қала орталығында тәртіпті сақтау үшін енгізілгенін айтқан болатын.
«Демократияға қауіп»
Қоғамдық наразылық алғаш рет жұма күні федералды агенттер Лос-Анджелестегі жұмыс орындарына рейд жасап, ондаған мигрантты қамауға алғаннан кейін өршіді.
Демалыс күндері наразылық шаралары күшейіп, демонстранттар ірі тас жолдарды жауып, көліктерді өртеді және тәртіп сақшылармен қақтығысты. Полиция газбен, резеңке оқтармен және дыбыс гранаталармен жауап берді.
АҚШ-тың Ішкі қауіпсіздік министрі Кристи Ноем дүйсенбі күні күдікті миграциялық заң бұзушылықтарға қарсы шаралар күшейтілетінін мәлімдеді. Трамп әкімшілігі шеруді заңсыз деп атады және штаттардағы Демократиялық партияның мүшелерін құжатсыз мигранттарды қорғады деп айыптады.
Калифорния губернаторы Гэвин Ньюсом федералды әскери күштерді Лос-Анджелеске орналастыруды «демократияға қауіп» және «заңсыз әрекет» деп атады. Ньюсом президент Трамптың теңіз жаяу әскерлері мен Ұлттық гвардияны пайдалануы азаматтық кеңістікті милитарландыру және демократиялық нормаларды бұзу үшін жасалғанын айтты.
Жергілікті шенеуніктер бастапқы толқуларға қарамастан дүйсенбі күнгі шерулер тыныш өткенін атап өтті. Мыңдаған адам муницапалитет алдына жиналып, жүздеген адам мигранттар қамауға алынған тергеу изоляторының алдында наразылық білдірген.
Шерулер 4 миллионға жуық халқы бар Лос-Анджелес қаласының орталығында өтуде. Шерушілердің айтуынша шеру тұтқындар босатылғанша және федералды үкімет миграцияға қарсы шараларын тоқтатқанша жалғасады.
