Түркия Газа секторындағы "көптен күткен" атысты тоқтату келісімін құптап, халықаралық қауымдастықты бұл бітімді қорғауға және соғыс зардабын шеккен аймақта гуманитарлық көмек пен қалпына келтіру жұмыстарын қолдауға шақырды.
Түркияның БҰҰ-дағы елшісінің орынбасары Аслы Гүвен «Түркия Газа секторындағы атысты тоқтату келісімінің орнатылуын құптайды және бұл келісімді толық әрі дереу жүзеге асыруға шақырады», – деді. Ол Палестина мәселесіне арналған БҰҰ Қауіпсіздік Кеңесінің отырысында сөз сөйледі.
«Халықаралық қауымдастық ретінде біздің ең басты міндетіміз – бұл көптен күткен және қиындықпен қол жеткізілген атысты тоқтату келісімін кез келген жағдайда сақтау», – деді ол.
Гүвен Батыс Шерияда атысты тоқтату шарттарының бұзылуы және қоныстанушылардың зорлық-зомбылық әрекеттерін болдырмау маңызды екенін атап өтіп, «Ливан, Сирия және одан да басқа аймаққа бағытталған шабуылдар мен тұрақсыздандыру саясаты тоқтатылуы тиіс» деп ескертті.
«Таяу Шығыс ұзаққа созылған соғыс циклін көтере алмайды. Даулар күш қолдану арқылы емес, дипломатиялық келіссөздер мен диалог арқылы шешілуі керек», – деді ол.
Гүвен екінші басымдық ретінде Газа секторына гуманитарлық көмекті кедергісіз жеткізуді қамтамасыз ету және «БҰҰ және оның тиісті агенттіктерімен, соның ішінде БҰҰ-ның Босқындарға көмек агенттігімен тығыз үйлестіру арқылы қалпына келтіру жұмыстарын кідіріссіз бастау» қажеттігін атап өтті.
