Католиктік ұйымдар мен бұқаралық ақпарат құралдарының хабарлауынша, Израиль Ливанның шекараға жақын орналасқан әл-Клайе ауылындағы бір үйге жасаған шабуылында ливандық маронит католик дін қызметкері Пьер әл-Рахиді өлтірді.

 Деректерге сүйенсек, дін қызметкері Пьер әл-Рахи шабуыл кезінде алған жарақаттарының салдарынан қайтыс болған.

 Әл-Рахи бұған дейін басқа дін қызметкерлерімен бірге Израильдің христиан ауылы әл-Клайені босату туралы заңсыз әскери бұйрығына бағынудан бас тартқан еді.

 “OSV” жаңалық агенттігі ливандық маронит дін қызметкері Жан Юнесстің мына сөздерін келтірді:

«Дін қызметкері Пьер әл-Рахи менің туған ауылым Дибехтен еді, бірақ ол Мерджайун аймағындағы әл-Клайе ауылындағы қауымның дін қызметкері болатын».

 Шамамен 8 мың тұрғыны бар бұл маронит ауылы Израиль шекарасынан бірнеше шақырым жерде, Мерджайун аймағында орналасқан.

 Израиль әскері Ливанның оңтүстігін, Бейруттың оңтүстігін және Бекаа аңғарын бомбалап жатыр.

 Ливан медиасының хабарлауынша, Израильге тиесілі «Меркава» танкі әл-Клайе ауылындағы бір үйге екі рет оқ атқан.

 Алғашқы шабуыл кезінде үй иесі мен оның жұбайы жараланған.

 Әл-Рахи мен бірнеше көршісі жараланғандарға көмектесу үшін жүгіріп барған сәтте танк қайтадан оқ атқан.

 Дін қызметкері Израиль танкінің екінші шабуылында жараланып, кейін алған жарақаттарының салдарынан көз жұмды.

 Шабуыл кезінде бірнеше ливандық бейбіт тұрғын да жараланған.