Еуропалық Одақтың (ЕО) Сыртқы істер және қауіпсіздік саясаты жөніндегі жоғары өкілі Кая Каллас дүйсенбі күні жасаған мәлімдемесінде блоктың Газа мен Мысыр арасындағы Рафах шекара бекетін бақылау үшін азаматтық миссияны сәрсенбі күні қайта іске қосатынын айтты. Бұл шешім Газаға қатысты атысты тоқтату туралы келісімді қолдауға бағытталған.

Каллас “X” платформасында «ХАМАС келісім аясында алғашқы израильдік тұтқындар тобын босатқаннан кейін ЕО өз үлесін қосуға дайын. Бұл миссия атысты тоқтатуды қолдауда маңызды рөл атқара алады», — деп жазды.

27 мүшелі блок Рафах шекарасын бақылау үшін 2005 жылы азаматтық миссия құрған, бірақ бұл миссия палестиналық тойтарыс қозғалысы ХАМАС Газаны өз бақылауына алғаннан кейін екі жылдан соң тоқтатылған болатын.

Еуропалық Одақтың Шекараға көмек көрсету миссиясы (EUBAM) маңызды стратегиялық шекарада бейтарап үшінші тараптың қатысуын қамтамасыз етуді мақсат етеді. Миссияға Италия, Испания және Франциядан келетін полиция күштері кіреді.

Бұл миссия қаңтар айында уақытша қайта орналастырылған, бірақ наурызда қайта тоқтатылған еді.

Дүйсенбі күні тұтқындардың босатылуын қуанышпен қарсы алған Каллас Дональд Трамптың «бейбітшілік орнатуда шешуші кезеңдегі» рөлін атап өтіп, АҚШ президенті «бұл серпілісті мүмкін етті» деді.

Еуропалық комиссияның төрайымы Урсула фон дер Ляйен дүйсенбі күні Шарм-эль-Шейхте өткен және соғысты тоқтату туралы келісімді түпкілікті бекіткен Газа саммитін «тарихи бетбұрыс» деп атады.

Фон дер Ляйен «Блок АҚШ, Катар, Мысыр және Түркияның делдалдығымен жасалған бейбітшілік жоспарын толық қолдайды», - деп жазды.

«Қолымыздағы барлық құралмен осы жоспардың жүзеге асуына үлес қосуға дайынбыз»,- деген ол «Палестина әкімшілігінің басқару және реформалық күш-жігеріне қолдау көрсетуіне» де атсалысатындарын айтты.

Шарм-эль-Шейхтегі саммитке Еуропалық Одақ атынан Еуропалық кеңес төрағасы Антониу Кошта қатысты.